Patay dihadiha ang 26 anyos nga lalake ug wala mahitsura ang ulo niini human nilayat gikan sa ika-12 nga andana sa La Guardia Flats 1 condominium sa Barangay Lahug, siyudad sa Sugbo, pasado alas 5:00 sa buntag kagahapon, Nobiyembre 28.

Si Police Staff Sergeant Roy Bacus sa Mabolo Police Station niila sa biktima nga si Ron Jushua Aguardera, 26, molupyo sa ikalima nga andana sa nahisgutan nga condominium.

Sa imbestigasyon sa Mabolo Police Station, ang uyab ni Aguadera nga si Ericka Lopez, niingon nga kini sa deperensiya sa panghunahuna.

Gituohan sa kapulisan nga wala makontrol sa biktima ang kaugalingon sa gihambin nga balatian rason nga nag-wild kini.

“Gipangbuak na niya ang mga jalousie sa ilang bintana sa unit. Mao ni ingon ni Lopez sa amoa,” dugang ni Bacus.

Nanawag kini sa selpon sa iyang uyab, nidagan paingon sa ika-12 nga andana ug milayat. Pag-abot sa ubos sa maong edipisyo, napusa ang ulo sa biktima.