TACURONG CITY -- Impas ang usa ka batan-on human pusila ug giilugan pa sa motor alas 6:25 sa gabii, niadtong Dominggo, Nobyembre 28, sa probinsya sa Sultan Kudarat.

Giila ang biktima nga mao si Ralph John Hobiera, 17-anyos, ug nagpuyo sa Barangay Kudanding, Isulan, Sultan Kudarat.

Gibutyag ni Isulan Chief of Police Lieutenant Colonel Gary Flor Marfil nga samtang nagpa-load ang biktima sa iyang cellphone uban ang uyab niini sa Barangay D'Lotilla, Isulan, Sulatan Kudarat, pag-andar na sa motor, kalit lang mibutho ang duha ka wala mailhing tawo ug gitiunan si Hobiera og armas.

Apan misukol ang batan-on ngadto sa mga suspetsado hinungdan nga gipusil siya gamit ang kalibre .45 nga pistola.

Abtik nga miikyas ang duha ka tawo dala ang motor sa batan-on paingon sa direksyon sa Tacurong City.

Patay on the spot ang biktima nga naigo sa iyang ulo ug dughan.

Sa kasamtangan, ang kapulisan sa Isulan Sultan Kudarat ang padayon nga nag-imbestiga kalabutan sa maong hitabo.