KIDAPAWAN CITY -- Mag-atubang sa kaso nga kalapasan sa Republic Act 10863, o Customs Modernization and Tariff Act, ang mga suspetsado nga namaligya og ismagol nga sigarilyo alas 5:20 sa hapon niadtong Dominggo, Nobyembre 28, sa probinsya sa Cotabato.
Matud ni Libungan OIC Chief of Police Captain Razul Pandulo nga nakadawat sila og impormasyon sa tulo ka mga tawo nga namaligya og smuggled cigarettes sa public market site duol sa old municipal compound sa Libungan, Cotabato.
Abtik nga nagresponde ang mga pulis apan pag-abot nila sa dapit nga ilang target mikaratil og dagan ang tulo ka mga suspetsado.
Narekober sa awtoridad ang 4,800 rims sa nagkadaiyang klase sa sigarilyo.
Gidugang ni Captain Pandulo nga nagkantidad og P2.4 milyones ang nailog nila nga ismagol nga sigarilyo.
Kahinumduman nga nakakompiska sab awtoridad og mga smuggled cigarettes sa Aleosan ug Makilala Cotabato ning bag-o lang.
Sa kasamtangan, padayon nga gipangita sa mga sakop sa Libungan Municipal Police Station ang mga suspetsado.