Duha ka drayber sa habalhabal nga giilang high value individual sa Cebu City Police Office (CCPO)) nasikop sa buy-bust sa dalan C. Padilla, Barangay Duljo Fatima, dakbayan sa Sugbo niadtong Dominggo, Nobiyembre 28, alas 11 sa gabii.

Nakuha ang kapin sa duha ka kilo nga shabu nga mobalor og P13.7 milyunes.

Target sa operasyon maos si Vinch Neil Arnaiz alyas “Baloy”, 27, drayber sa habalhabal ug taga dalan Spolarium, Duljo Fatima, human migawas ang iyang pangalan gikan sa usa ka tinubdan sa kapulisan.

Lakip sa nasikop ang iyang pangabaga sa illegal nga negosyo nga si Jessie Caballero alyas “Pogi” nga usa usab ka drayber sa habalhabal ug taga Barangay Quiot.

Matod ni Police Colonel Josefino Ligan, hepe CCPO, nga si Arnaiz adunay agalon nga bilanggo na sa Cebu City Jail nga mao usab ang nag-supply kaniya sa illegal nga drugas ug si alyas Pogi ang mohatod niini ngadto sa street pushers.

Dugay na, matod pa, nga nalambigit sa illegal nga drugas si Baloy ug giingong sakop kini sa usa ka drug group nga naglihok dinhi sa Sugbo.

Timailhan niini ang putos nga Chinese tea bag nga gisudlan sa kinilo nga gituohang shabu nga susama kini sa nakuha nga 8 kilos sa milabayng tuig sa Barangay Talamban nga gipadagan usab sa usa ka dakong drug personality nga nabilanggo na sa New Bilibid Prison.

Ang kanhi agalon niini maoy nag pailaila niya sa drug personality nga naa usab sa bilanggoan sa dakbayan sa Sugbo nga wala lang una nganli ni Ligan tungod kay nagpadayon pa ang imbestigasyon.

Giingong maka baligya si Baloy og 4 ngadto sa 5 kilos matag buwan diin moabot ang iyang supply sa drugas sa mga silingang siyudad ug lungsod sa lalawigan sa Sugbo.

Sulod lang sa 29 ka adlaw sa Nobiyembre nakasakmit na ang CCPO og 5,700 gramos sa gituohang shabu nga adunay kantidad nga P38,760,000.

Gibutyag ni Ligan nga daghan ang nasakmit sa tibuok Nobiyembre itandi sa milabay nga mga buwan nga makakuha lang sila og tag 3,000 gramos.

Nagtuo siya nga gisakyan sa mga durugista ang pagluag sa quarantine ug ang holiday season hinungdan nga daghan ang nakuha anti-illegal drug operations sa kapulisan.

Samtang, moabot usab ngadto sa 119 ka mga indibidwal ang nadakpan sa CCPO sa usa ka adlaw nga synchronized anti criminality and law enforcement operation kun Sacleo niadtong Biyernes, Nobiyembre 26.

Matod ni Ligan nga nakahimo sila og 103 ka operations nga naglangkob sa illegal gambling, illegal drugs, pag-serve sa mga warrant of arrest diin naka dakop silag most wanted persons, lakip na niini ang loose firearms.

Ang labing dako nga ilang nakuha mao ang illegal nga drugas diin nakasakmit sila og kapin sa 200 gramos gikan sa drug personalities.