Ipaimbestigar ni Mayor Michael Rama ang giingong pagpangilkil og P100,000 sa usa ka kawani sa Market Operations Division (MOD) sa matag vendor sa merkado publiko sa Carbon.

Nagtuo si Rama nga ‘tip of the iceberg’ ang pagpangilkil sa kawani nga si Kara Arcilla-Bargamento busa iyang ipaimbestigar ang gibuhat niini.

Bitaw, imposible kaayo nga ang usa ka ordinaryong kawani ingon niadto ka isog nga mangayog og ingon niana ka dako, kana ko n tinuod ang pasangil, sa kwarta gikan sa ordinaryong mga vendor. Dako kaayo ang kahigayunan nga duna kini gisandigan nga opisyal nga maoy iyang gisaligan.

Karon sa pag-asumer ni Rama sa katungdanan human sa kamatayon ni Mayor Edgardo Labella, ang kaso ni Bargamento mahimong unang pagsuway sa iyang liderato. Molutaw ba kaha ang tinuod, nga si Bargamento wa mag-inusara sa iyang gibuhat? Siya lang ang dagway nga mitumaw sa pagkakaron.

Di ni unang higayon nga dunay giingong pagpangilkil sulod sa city hall. Sa miaging tuig, dunay duha ka pribadong mga tawo nga na-entrap usab human giingong nangilkil gamit ang ngan sa usa ka dakong opisyal sa Siyudad.

Apan human niadto, wa imbestigasyon nga napahigayon kon unsa ka tinuod ang mga alegasyon.

Karon nga niingon na man si Rama nga ang kurapsyon di niya “cup of tea,”busa magpaabot ang mga Sugboanon nga dunay mas lawom nga imbestigasyon ug tanang mga nangalambigit pagasilhigon.

Tingali, sa kasaysayan sa City Hall, usa ni sa mga dakong anomaliya, kana kon mamatud-an sa imbestigasyon nga dunay mas taas nga opisyal nga nagpaluyo niini.

Iapil usab unta sa imbestigasyon ang lifestyle check sa mga opisyal nga matumbok sa imbestigasyon, kon duna na ba silay napalit nga mga kabtangan, sama sa sakyanan, bisan kon ang ilang pay grade layo ra kaayo sa kapabilidad sa pagpalit.

Dinhi mamatud-an ni Rama nga ang iyang administrasyon di mopiyong basta kurapsyon.