Contact sports arangkada na

DAVAO. Sports Division Chief Mikey Aportadera. (SunStar Davao File)
DAVAO. Sports Division Chief Mikey Aportadera. (SunStar Davao File)

MIHATAG na og pagtugot ang Davao City Covid-19 Task Force alang sa pagbalik sa contact sports, apan sa limitado lang nga ihap sa mga duwa ug bakunado na nga mga magdudula.

Gikanayon ni Sports Division Chief Mikey Aportadera sa siyudad sa Davao sa paghinabi kaniya sa radyo kagahapon, Martes, Nobyembre 30, nga ang Task Force, atol sa panagtigum niadtong Lunes, Nobyembre 29, misugot na niini, apan ang kopya sa resolusyon naghuwat pa nga lagdaan ug ipagawas, uban sa mga sumbanan aron nga maseguro nga mga paugnat sa kusog ug kalihukan di mahimong tinubdan sa pagtakod sa Covid-19.

"It was already agreed na pwede na ta mag-resume sa atoang contact sport but very limited ang atoang movement in terms of sa unsaon pagbuhat og dula," tug-an ni Aportadera sa paghinabi kaniya sa 87.5 FM Davao City Disaster Radio.

Mga sumbanan ipagawas sa social media account sa City Government of Davao kung andam na kining ipublikar.

Hinuon, ang iyang buhatan sa pagkakaron naghimo lang og mga sumbanan alang sa basketball, football (soccer), volleyball, ug ultimate frisbee.

Kini nga mga duwa gitumong alang sa kalihukang recreational ug pasingot o ehersisyo. Mga dagkong padula ug torneyo gidili pa ning panahona.

Giesplikar sa opisyal nga ang upat ka mga paugnat sa kusog, gawas nga inilang mga duwa, mahimo sab duwaon sa gawas nga mas luwas sa transmisyon sa Covid-19.

Ang matag paugnat sa kusog dunay kaugalingong sumbanan, apan sa kinatibuk-an, ang pagdumala sa lugar o court kinahanglang magseguro nga tanang mga magdudula "fully vaccinated" ug kinahanglan nga ipresentar ang ilang vaccination cards and SafeDavao QR (DQR) code. Tanang mga magduduwa kinahanglan mokuha og "reservation" sa lugar una ang ilang duwa.

Mga magdudula lang ang gitugtan nga mosulod sa lugar. Mga motan-aw istriktong gidili.

Ubang health protocols sama sa mandatory nga pagsul-ob sa masks, footbath, ug pagsusi sa temperatura sa pagsulod kinahanglan nga sundon.

Ang pagsul-ob og face masks atol sa duwa boluntaryo na lang, basta kinahanglan nga sul-obon kini human sa duwa. Pagpalayo sa uban sa pagpalingkod mandatory usab.

Sa kaso sa basketball, matud niya nga ang iyang buhatan nakig-alayon pa sa Vice Mayor’s Office aron magtakda og tigum uban sa tanang mga kapitan sa barangay sa siyudad aron nga hisgutan kon unsaon sa mga barangay makapadula basketball courts ubos sa ilang superbisyon.

"The barangays will be mandated na bantayan ang mga basketball courts nila na identified asa pwede madula," tin-aw niya.

Ang mga duwa sa basketball gawas sa "designated courts" di tugtan.

"Bawal usa modula sa mga ring na ibutang sa punoan," pagklaro ni Aportadera. "This is prohibited for now since the implementation of health protocol will not be imposed since there is no means of checking the vaccination card, DQR, and the temperate check."

Sa Alert Level 2 nga klasipikasyon kon diin nahilakip ang Davao City, contact sports gitugtan na apan mag-agad sa mga LGUs.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph