KIDAPAWAN CITY -- Luwas na ang duha ka tawo nga naangol sa pagkahulog sa multicab sa pangpang alas 9:25 sa buntag niadtong Lunes, Nobyembre 29, sa Makilala, Cotabato Province.
Naila ang mga naangol nga sila Damaso Tumanggong ug si alyas Dondon nga drayber sa multicab ug pulos molupyo sa Barangay Bato sa maong lungsod.
Sa taho gikan sa traffic section sa Makilala Municipal Police station, nasayran nga sakay ang mga biktima sa multicab nga gimaneho ni alyas Dondon nga puno og karga nga sinakong mais nga itumod unta sa lungsod.
Apan pag-abot sa multicab sa sakaon nga parte sa kalsada sa Barangay Bato kalit lang napalong ang makina niini ug diretso kining miatras ug wala na makontrola sa drayber hinungdan nga nahulog sa bung-aw sa kilid sa kalsada.
Ang drayber ug si Tumanggong dali nga gisapupo sa mga molupyo nga nakasaksi ug gidala ngadto sa Makilala District Hospital diin luwas na sila sa makuyaw nga kahimtang.
Nagpasidaan ang Makilala police sa mga drayber og sakyanan nga nagbiyahe sa kabukiran nga dili sobrahan ang ilang karga aron dili masusama sa nahitabo sa multicab.