KIDAPAWAN CITY -- Tungod kay grabeng naapektuhan sa mga pagbaha ang Kabacan, sa probinsiya sa Cotabato, gipailawom kini sa state of calamity subay sa Resolution 2021-343 sa Sangguniang Bayan sa lungsod.

Nasayran nga gibaha na ang lungsod sugod pa niadtong unang semana hangtud sa ikatulong semana sa Nobyembre tungod sa pagdaut sa panahon.

Subay kini sa pagsusi sa buhatan sa Municipal Disaster Risk Reduction and Managemet (MDRRMO-Kabacan) nga gipangulohan ni David Don Saure.

Moabot sa 2,071 ka pamilya ang naapektuhan samtang 485.55 ektarya sa agrikultura ang nangadaut sa baha.

Unom ka barangay ang gilunopan sa tubig-baha nga gilangkuban sa mga barangay sa Cuyapon, Lower Paatan, Magatos, Kilagasan, Bannawag, ug mga sitios sa Punol ug Lumayong sa Kayaga.

Giandam na sa lokal nga panggamhanan sa Kabacan nga gipangunahan ni Mayor Herlo Guzman Jr. ang pundo gikan sa calamity fund nga itabang sa mga pamilya nga naapektuhan sa baha.

Sa kasamtangan, nakig-alayon na sab ang Municipal Agriculture sa Department of Agriculture sa tabang nga itunol ngadto sa mga mag-uuma nga gibanlas ang mga pananum sa baha.