Barrita: ‘No work, no pay’ sa walay bakuna

MAHIMONG ipatuman sa employers sugod karong adlawa, Disyembre 1, 2021, ang “no work, no pay” policy alang sa mga empleyado nga kinahanglang motrabaho “on site” apan di makahimo niini kay nagdumili sila sa pagpabakuna batok sa Covid-19 ug magpakuha og RT-PCR test.

Apan ang no work, no pay policy alang niadtong mga kawani nga way bakuna gisupak sa mga labor unions nga niingon nga kining maong policy usa ka matang sa pagsilot ug diskriminasyon sa wa mabakunahi.

Si Labor Assistant Secretary Teresita Cucueco niingon nga subay kini sa Inter-Agency Task Force (IATF) for the Management of Emerging Infectious Diseases Resolution 148 nga giluwatan sa Nobiyembre 12 ug giamendahan sa Resolution 149 nga giluwatan sa Nobiyembre 18.

Ang duha ka resolusyon nagmando nga ang mga kawaning wa mabakunahi ug motrabaho on site kinahanglang makapakita og negatibong resulta sa RT-PCR o reverse transcription-polymerase chain reaction tests kausa kada duha ka semana. Madawat ang rapid antigen Covid-19 tests kon way RT-PCR test sa ilang dapit.

Matod ni Cucueco mao kini ang mahitabo. Ang kawani nga way bakuna mahimong adto ra magtrabaho sa balay kon dunay “work-from-home arrangement.” Apan kon wa, ug kinahanglan siyang motrabaho on site, magpa-test siya sa Covid-19. Kon di siya magpa-test, mo-apply siya og paid leave of absence. Apan kon mahurot ang iyang leave credits, moabot na ngadto sa “no work, no pay.”

Way labot sa no work, no pay policy ang mga kawani nga nakadawat na sa unang dose sa bakuna ug duna nay schedule alang sa ikaduhang dose. Sa pagkakaron, miabot na sa 32.9 ka milyon ka mga Pilipino ang nabakunahan batok sa Covid-19.

Si Steven Yu, presidente sa Mandaue Chamber of Commerce and Industry (MCCI) niingon nga mosunod sila sa mga resolusyon sa IATF aron makatabang sila nga makab-ot sa nasod ang herd immunity ug mabuksan na pagbalik ang ekonomiya.

Apan si Alan Tanjusay, nasudnong tigpamaba sa Trade Union Congress of the Philippines (TUCP), niingon nga ang no work, no pay policy usa ka matang sa pagsilot ug diskriminasyon sa mga kawani nga wa mabakunahi.

Ang angay nga buhaton sa gobyerno mao ang paghatag og mga incentives aron makombinsir ang mga trabahante nga magpabakuna sama sa paid leaves, financial bonuses, rice allowance ug libreng sakay paingon sa mga vaccination sites, matod niya.

Samtang si manlalaban Nora Ana Meterio-Diego, bise presidente sa Associated Labor Unions (ALU) Central Visayas, nisaway sa maong policy kay di man mandatory ang pagbakuna ubos sa Republic Act 11525, ang Covid-19 Vaccination Program Act of 2021. (edbarrita@gmail.com)