NAGKADAIYANG pundok sa cause-oriented group ang mipahigayon og lihok protesta sa Metro Cebu area, kagahapon, Nobiyembre 30 agig paghandum sa Bonifacio Day.

Apan ang grupo sa Sanlakas, Partido Lakas ng Masa, Buklorang Manggagawa ng Pilipinas ug pundok sa kababayen-an nga Oriang ang wa molampos sa ilang gitakda nga rally atubangan sa Cebu International Convention Center, dakbayan sa Mandaue.

Sa dihang kapulisan mibadlong kanila sa pagpahigayon og asembliya sa maong dapit tungod kay wa silay permit gikan sa kagamhanan sa Mandaue.

Mitugot lang si Police Lieutenant Kerwin Bejer, Mandaue City Police Office nga makatapok ang grupo atubangan sa CICC alang sa pictorial.

Si Teodorico Navea, secretary general sa Sanlakas, nagkanayon nga gipili unta nila ang CICC tungod kay nagsimbolo kini sa kapakyas sa opisyal sa kagamhanan.

“Unsa may nahitabo karon sa CICC, asa naman ni karon pa ingon?,” kuwestiyon ni Teodorico.

Niadtong Nobiyembre 22, ang Sanlakas nisang-at og reklamo sa Office of the Ombudsman Visayas batok ni Cebu governor Gwendolyn Garcia og grave misconduct ug gross neglect of duty tungod sa giingong napakyas nga pagtubag sa pandemya.

Dugang pa ni Teodorico nga ang demonstrasyon nagtumong sa paghatag og dugang pressure sa gobernador ilabina nga adunay bag-ong variant sa coronavirus disease 2019 (Covid-19) nga naghulga sa nasud.

Sa susamang kalambuan, ang mga sakop sa Bayan Cebu, AMA Sugbo-KMU, Kabataan Partylist ug uban pang-raliyesta nagtapok sa dalan Colon.

Gipadayag sa maong grupo ang ilang kasagmuyo ngadto sa administrasyong Duterte.

Adunay effigy sa presidente nga ilang giguba gamit ang sundang, ang hinagiban nga gigamit sa nasudnong bayani nga si Andres Bonifacio sa pakigbatok sa mga langyawng mananakop.

Wa magdugay ang mga demonstrador sa dihang gibungkag ang maong tapok sa kapulisan.