GIKLARO ni Davao City Mayor Sara Duterte-Carpio nga way gipatuman nga palisiya ang siyudad nga nagkanayon nga ang wala mabakunahi nga mga kawani sa gobyerno di makadawat og bonus, apan di sila iprayoridad alang sa "renewal."
Atol sa Special Hours uban ni Mayor Inday Sara Duterte nga programa sa Davao City Disaster Radio niadtong Lunes, Nobyembre 29, 2021, gikanayon niini nga ang nabakunahan nga mga kawani sa gobyerno maoy iprayoridad alang sa "renewal" sugod Enero 1, 2022.
"They (unvaccinated) will not be prioritized for hiring sa January, particularly kining mga job orders (especially the job orders)," tin-aw sa mayor. "Sa atoang admin, ang permanent employees nato, naa nay gi-release na legal opinion na they can be reprimanded under the City Government of Davao kung dili sila magpabakuna."
Ang lokal nga panggamhanan sa Davao nagpagawas niadtong Septyembre 16, 2021 sa Executive Order No. 45 Series of 2021 nga nagmando og Covid-19 vaccination alang sa tanang mga kawani sa siyudad, naglakip sa plantilla, job order, contract of service, ug volunteer nga mga empleyado.
Apan gitin-aw sa mayor nga dunay ubang mga kawani nga "exempted" sa maong mando basta gi-endorsar sila sa Vaccine Cluster Head nga di ilakip sa pagbakuna.
"We also allow exclusion or exemptions sa vaccination provided that isa ka didto sa nasulod sa Department of Health (DOH) na guideline na dili pwede bakunahan," dugang pagklaro sa mayor.
Sayo niini, giesplikar sa mayor nga ang Executive Order No. 45 wala masukwahi sa Labor Advisory No. 3 sa Department of Labor and Employment nga nagprotekta sa mga kawani nga ma-discriminate tungod kay mibalibad nga mabakunahan.