PERSONAL nga bikil ang usa sa mga nakit-ang motibo sa pagpatay sa manager sa Tagum Gasul nga gipusil sa wala mailhing armado didto sa Purok Malinawon 1 Briz, Barangay Magugpo East, Tagum City alas 5:55 sa gabii, Nobyembre 30, 2021.
Padayon pa kining gisubay sa kapulisan kon diin ang biktima giila nga si Mercy Pilosopo Martinez Tagaro, 35, minyo, molupyo sa Indangan, Buhangin, Davao City.
Base sa imbestigasyon, nasayran nga ang biktima miabot sa nahisgutang dapit sakay sa motorsiklo ug giparking kilid sa usa ka warehouse.
Misulod ang biktima sa convenience store ug namalit ug personal nga mga panginahanglan ug human niini mibalik og baktas padulong sa warehouse nga maoy silbi niyang staff house.
Apan sa dihang motikang na unta sa ang-ang sa hagdanan pasaka sa warehouse, usa ka wala mailhing lalaki ang mitunga ug dayon pusil kaniya sa makadaghang higayon tumong sa ulo ug sa nagkadaiyang parte sa lawas nga miresulta sa hinanaling kamatayon sa biktima.
Abtik sab dayong misibat ang suspek paingon sa wala masayring direksiyon.
Narekober sa kapulisan sa Tagum City Police Station gikan sa crime scene ang unom ka mga basiyo sa bala sa gituohang kalibre .45 nga pistola.
Patay'ng lawas sa biktima gipahiluna na sa Rubio Funeral Services samtang imbestigasyon sa kapulisan nagpadayon.