NALIT-AG ra gyud sa mga awtoridad alas 8 sa buntag niadtong Martes, Nobiyembre 30, 2021, ang suspek sa pagpatay sa Italian priest niadtong 2011.
Naila ang suspek nga si Ricardo Boryo Dorado alyas Nene Dorado, 65, minyo ug kanhi kapitan sa Barangay Dallag, Arakan, Cotabato Province.
Sumala kang Arakan Chief of Police Captain Edgar Allan Espadera nga milusad sila og manhunt Charlie Operation, uban ang Regional Intelligence Division (RID)-Soccsksargen Tracker nga gipangulohan ni Lieutenant Colonel Jojet Nicolas batok sa suspek sa hilit nga dapit sa Barangay Dallag.
Wala na maka-ikyas si Dorado sa dihang napalibutan na sa mga pulis ang iyang balay.
Ang pagdakop kang Dorado nahisubay sa gahum sa warrant of arrest nga giisyu ni Judge Arvin Balagot sa Regional Trial Court-Soccsksargen, Branch 17 sa Kidapawan City sa kasong pagpatay.
Gitudlo sa mga testigo ang suspek nga nalambigit sa pagpusil patay sa pari nga si Fr. Faustino "Pops" Tentorio, kinsa usa ka misyonaryo sa Pontifical Institute for Foreign Missions.
Sa kasamtangan, gibalhog ang suspek sa prisohan sa Arakan Municipal Police Station samtang nagpaabot sa sunod nga mando sa korte.