GIKATAKDANG maghimamat ang kanhi basketball players sa Cebu Amateur Athletic Association (CAAA) sa umaabot nga Christmas reunion nga pasiugdahan sa CAAA Basketball Alumni Association (CBAA).

Si CBAA president Inocentes “Jun” Montalbo mibutyag nga ipahigayon ang kalihukan karong Disyembre 18, 2021 sa seaside compound ni Vice-Mayor Vergilio “Jingjing” Chiong sa City of Naga.

Matod ni Montalbo nga dul-an sa 200 ka mga partisipante ang mikompirmar na sa ilang presensiya alang sa kalihukan.

Dunay pipila ang dili makatambong ilabi na kadtong atoa sa gawas sa nasod apan kinasingkasing kini silang mipadala og suportang pinansyal alang sa aktibidad.

Aron paghatag og kasayon sa pipila ka mga partisipante, adunay libreng sakay nga maoy mokuha ug mohatod paingon sa venue. Kini anha magpaabot sa Malacañang sa Sugbo (sa likod nga bahin sa Plaza Independencia) nga molarga untop alas 11:00 sa udto.

Ang Q and A games, sing-along contest, videoke, live band maoy pipila ka mga modayan-dayan sa panagtapok.

Lakip sa mga mikompirmar sa ilang presensya mao ang kanhi mga magduduwa sa Philippine Basketball Association (PBA) nga sila si Al Solis, Bonel Balingit, Elmer “Boy” Cabahug, Max Delantes, Marlowe Jacutin, Montoy Singson, Dondon Hontiveros, Roger Yap, Calvin Tuadles, ug Mark Anthony Tallo.

Si Montalbo mipasabot nga ang katuyoan niini mao ang pagpahugot sa camaraderie sa kanhi CAAA players ning panahon sa Pasko taliwala ning pandemiya.