NA-ADMIT sa usa ka Isolation Center sa dakbayan sa Sugbo si Budoy tungod kay nag-positibo siya sa Covid-19, ang pandemya nga milaygay sa minilyon ka mga tawo sa tibuok kalibutan. Traysikad drayber si Budoy. May asawa, si Mayang, ug duha ka anak, si Tupoy ug si Estoy. Duha na ka semana nga siya natanggong sa Center sukad adtong katapusang semana sa Nobiyembre ug nabalaka siya sa iyang pamilya bahin sa ilang panginabuhian. Gagmay pa ang mga bata. Si Mayang nanglabada ug gamay ra ang kinitaan karon tungod sa usa ka ‘laundry washing service’ nga natukod sa ilang dapit sa Tagunol. Ang ubang mga suki ni Mayang adto na magpalaba sa ‘electric washing machine.’
May pagmahay si Budoy sa langit kay Disyembre na karon ang bulan sa Pasko.
Usa ka buntag samtang naglingkod siya sa kama nakita niya ang nars nga nagpaingon sa iyang nahimutangan. Nagsul-ob kinig ‘protective personal equipment’ ug morag astrunot tan-awon. Sa iyang bahin nagsul-ob siyag ‘face mask’ ug ‘face shield’. Sa iyang hunahuna mora sab siyag piloto.
Ang nars may dalang trey. Gibutang niya kini sa kama ni Budoy. Giindeksyunan niya si Budoy ug gipatomar og tabletas.
“Nagsingabot na ang Pasko. Makagawas na kaha ko, Ma’m?” matod ni Budoy.
“Di pa, Sir. Basig inigkatapos sa Disyembre pa ka makagawas. Luya pa ka. Wa pa mawa ang virus sa imong lawas.”
Nianang pagka gabii wa mahikatulog dayon si Budoy. Gusto niya nga ikauban ang iyang pamilya sa adlaw sa Pasko, sama sa nangaging mga katuigan. Bisan sila kabos malipayon silang nagsaulog sa sumad sa pagkatawo sa Balaang Bata nga si Hesus, bisag ang ilang pang-Noche Buena mao lamang ang ‘sliced bread’ ug pansit kanton. Unya mikidlap sa iyang hunahuna ang rebulto ni Senyor Santo Nino sa altar sa ilang pinuy-anan. Nakapahiyom siya. Miluhod siya atubangan sa iyang kama ug nag-ampo.
“Senyor Santo Nino, bug-os ang akong pagtuo Kanimo ug sa mga milagro nga Imong nahimo. Kaluy-a intawon ako! Wad-a na ang kagaw nga nag-ulipon sa akong balatian. Hatagi kog kabaskog aron makapauli na ko sa amo. Gusto ko nga ang ihatag mong pinaskohan nako mao nga sa sumad sa adlaw sa Imong Pagkatawo atua ako sa kiliran sa akong pamilya!” Hugot ang pagpangaliya ni Budoy sa Balaang Bata. Nakahilak gani siya.
Paglabay sa tulo ka tulo ka adlaw ang nars nga nag-atiman kang Budoy kuyog ang usa doktor miduol sa kama ni Budoy.
“Okey ka na, Sir. Makagawas ka na ugma. Speedy ang imong recovery!” matod sa doktor nga nagpahiyom. “Kahibulongan ang nahitabo kanimo!”
“Bitaw, Sir!” sagbat sa nars.
BISPERAS sa Pasko. Disyembre 24. Sa barungbarong nga gipuy-an sa pamilya ni Budoy nag-andam na si Mayang alang sa Noche Buena. Gawas sa linung-ag nga kan-ong humay, dihay ‘sliced bread’ ug pansit kanton sahi sa ilang naandan. Apan may nahidugang nga lamiang sud-an sa lamesa, usa ka buok inasal nga manok.
Pagka taudtaod mibagting ang alas dose sa kagabhion. Dili kaayo alingisig ang palibot kay gidili ang mga pabuto tungod sa pandemya. May mabati gihapong buto-buto sa rebentador.
“Sa kaluoy sa Batang Diyos nga natawo karon, Mayang, dako-dako ang akong kita sa pamasadag traysikad karon,” matod ni Budoy. “Pasalamatan nato Siya.”
“Angay gyud, Budoy, uy!” ni Mayang.
“Hala, tawga na ang mga bata aron mangaon na ta,” ni Budoy nga mitan-aw sa rebulto ni Senyor Santo Nino ibabaw sa altar. Nanguros siya ug nagpasalamat nga gidungog sa Balaang Bata ang iyang pag-ampo. (KATAPUSAN)