KON tugotan sa balaud, mahimong P6,000 na ang Christmas bonus sa mga job order (JO) sa Cebu City Hall human si Mayor Michael Rama modugang og P3,000.

Ang Cebu City Government, pinaagi ni Rama ug City Councilor Raymond Garcia, unang nianunsyo nga makadawat og tag P3,000 ang kapin o kulang 4,700 ka JOs nga nagtrabaho sa lainlaing departamento sa City Hall.

Apan kagahapon, Disyembre 1, si Rama nimando sa bag-ong city administrator nga si Engr. Suzzane Ardosa sa paglili sa posibilidad nga doblehan kini sanglit adunay igong pundo ang Dakbayan para sa paghatag og dugang P3,000 para sa mga JO.

Gustong ipaklaro ni Rama kon aduna bay balaod nga nagdili sa paghatag og sobra sa P3,000 nga Christmas bonus sa mga JO sanglit kon wala, dason niya, doblehon ang pasiunang bonus nga P3,000.

Si Garcia, sa iyang bahin, niingon nga mosugyot siya kang Rama nga inay himuong P6,000 ang bonus, dugangan na lang og usa ka sakong bugas ang madawat sa JOs ug mahimo na kining duha ka sako sanglit naduso na ngadto sa City Council ang Supplemental Budget (SB) 2.

Gipasabot ni Garcia nga ang P3,000 anaa na sa Annual Budget 2021 para sa 3,000 ka mga JO apan nahimo kining 4,700 gumikan sa pandemic diin mga JO ang gi-hire para sa vaccination, isolation center, contact tracers ug uban pa.

Ang bonus nga naa sa SB2 mao ang para sa 1,700 ka JOs nga wala maapil sa budget sa 2021 sanglit, matod pa ni Garcia, mapangitaan ra og pundo nga aprubado na sa Konseho ang pagpalit sa mga bugas nga magamit sa ilang panimalay.

Ang mga regular ug casual nga kawani makadawat og P20,000 nga Christmas bonus apan silang tanan apil na ang mga JO kinahanglan pulos bakunado sa dili pa nila madawat ang bonus.

Ang mga empleyado ug JO nga dili magpabakuna kay dunay mga gihambin nga balatian ug kadtong mga dili pa preparado ang ilang lawas ug hunahuna, si Rama niingon nga kinahanglang dunay medical certificate nga pinirmahan sa doktor kinsa nagtrabaho sa usa ka public hospital.

Sa pagkakaron, ang SB No. 2 padayon pa nga gi-deliberate sa konseho diin naapil ang bonus sa mga empleyado ug JO.