PADAYON ang pag-ubos sa ihap sa mga aktibo ug bag-ong mga kaso sa coronavirus disease-2019 (Covid-19) sa Cagayan de Oro City.

Anaa na sa 156 ang aktibo nga mga kaso ug lima ang natala nga mga bag-ong kaso sa dakbayan.

Pulos mga local cases with link ang mga bag-ong mga kaso. Miabot sa 20,418 ang kinatibuk-ang ihap sa mga kaso sa Covid-19 sa dakbayan.

Ang Cagayan de Oro adunay 156 active cases, 31 niini na-admit sa Northern Mindanao Medical Center ug uban pang mga ospital sa syudad, ug 125 ang mga outpatient.

Nakatala usab og usa ka coronavirus-positive nga kaso nga karon naka-recover human nagnegatibo ang resulta sa ilang repeat swab test.

Anaa na karon sa 19,412 ang ihap sa mga nakarekober nga mga kaso sa dakbayan.

Ang ihap sa mga namatay sa Covid-19 sa syudad naa sa 850.