PADAYONG gipangita sa mga awtoridad ang nanag-iya sa dakong plantasyon sa marijuana, diin mga dagkong punoan sa tanum gipanglarot ug gipangdabdaban alas 12:25 niadtong Miyerkules sa udto, Disyembre 1, 2021, sa usa ka barangay sa Columbio, Sultan Kudarat.

Gibutyag ni Sultan Kudarat Provincial Police Office Director Colonel Tom Tuzon nga gironda sa mga sakop sa Philippine Drug Enforcement Agency (PDEA)-Soccsksargen ug uban pang yunit sa kapulisan ang plantasyon sa marijuana didto sa Sitio Asmakul-Basag, Barangay Sinapulan sa nahisgutang lungsod.

Pag-abot sa mga awtoridad sa dapit, nakasibat na ang target sa operasyon nga giingong maoy nanag-iya sa plantasyon nga sila si alyas Vincent Estrada ug Virgel Estrada.

Subay sa drug market value, mokantidad og P2.2 milyon ang mga nalarot sa mga awtoridad nga mga punoan sa marijuana ug gidauban.

Gikanayon ni PDEA-Soccsksargen Spokesperson Kit Abad nga mibaktas pa og duha ka oras ang mga awtoridad una naabot ang plantasyon nga nahimutang sa hilit nga dapit sa nahisgutang barangay.

Mismo ang mga sibilyan maoy mipindot sa mga awtoridad ug mihatag og impormasyon sa nadiskubre nilang plantasyon sa marijuana.