Nagkadaiyang relihiyusong sektor sa Davao Region nag-adbokasiya alang sa pagbakuna sa Covid-19 taliwala sa giingong dunay mga lideres sa lokal nga relihiyon nga nagduha-duha sa bakuna.

Sa video nga gi-post sa opisyal Facebook page sa Department of Health-Davao (DOH-Davao) kagahapon, Huwebes, Disyembre 2, 2021, sila si Archbishop Romulo Valles, Reverend Anselmo Ingay sa Bible Baptist Church Davao, ug Comm. Alim Jamal Munib sa Ulama Sector - National Commission on Muslim Filipinos, ug uban pang mga lideres, mihatag sa ilang mensahe nga nagdasig sa publiko nga magpabakuna batok sa Covid-19.

Ang video message nagkanayon nga ang bakuna maoy epektibo nga proteksiyon batok sa pagkuyanap sa kagaw.

"Sa padayon nato pakigbatok aning pandemya, padayonon natong mamahimo kitang usa sa tumong nga maprotektahan atong pamilya ug matag usa," sumala sa unod sa video message.

Ubang mga relihiyusong lider kinsa nag-adbokasiya alang sa Covid-19 vaccine mao sila Sherrila Porza-Sawah sa National Commission on Muslim Filipinos XI, Elder Ferdinand Pangan sa Church of Jesus Christ of Latter-day Saints, Rev. Grace Bangisan sa United Church of Christ of in the Philippines, ug Pastor Edwin Magdadaro sa Davao Mission sa Seventh-day Adventists.

Kahinumdoman nga laing video nga nag-viral sayo ning tuiga, nagpakita sa usa ka wala panganli nga pastor nga nagbase sa Davao City nagpakatap og sayop nga impormasyon bahin sa bakuna sa Covid-19 nga nagdugang hinuon sa pagpanagana sa publiko nga magpabakuna.

Apan ang wala magpabakuna nga pastor nasayran nga nataptan sa kagaw ug grabe, subay sa gibutyag ni Davao City Mayor Inday Sara Duterte-Carpio atol sa paghinabi kaniya sa 87.5 FM Davao City Disaster Radio niadtong Septyembre 13, 2021.

Taliwala sa mga sayop nga pag-angkon sa bakuna, gitug-an ni Dr. Lenny Joy Johnson-Rivera, Assistant Regional Director sa DOH-Davao nga 94 porsiyento sa namatay tungod sa Covid-19 wa nabakunahan.

"Walang deaths sa Davao Region because of the bakuna alone. Most of the deaths that we have, may (severe) comorbidities," pagtin-aw niya.