MODUSO og motion for reconsideration ang kampo ni gubernatorial aspirant Joseph Felix Mari “Ace” Durano kalabot sa pagkombikto sa Sandiganbayan kaniya ug sa iyang mga staff sa Department of Tourism (DOT) may labot sa wall calendar project sa 2008 atol sa siya pa ang Tourism secretary.

Dunay tulo ka mga kaso nga gipasaka batok kang Durano ug sa lima pa ka mga kaubanan niini sa buhatan sa 2016 labot sa pag award sa P2.7 milyones nga kantidad sa proyekto atol sa iyang termino sa 2008 ngadto sa 2009.

Apan ang duha ka mga kaso gi dismiss sa korte.

Nahabilin nga kaso ang sa wall calendar project nga gi-subject sa uwahing promulgation sa Sandiganbayan sa Nobiyembre 26, 2021.

Kauban ni Durano nga gipangkiha mao sila si kanhi DOT undersecretary Oscar Palabyab ug kanhi opisyales sa Bids and Awards Committee (BAC) nga sila si Grave Yoro, Eduardo Jarque Jr., Evelyn Cajigal, ug Adriana Flor.

Matod sa Ombudsman nga si Durano solo nga mipirma sa MOA human ni-issue og certification nga nag-identify sa PDP Digital Inc. isip supplier sa DOT niadtong Disyembre 2, 2008 nga kinahanglan untang dunay BAC resolution nga mag-justify alang sa laing pamaagi sa procurement.

Ang Ombudsman miingon nga ang BAC miuyon sa certification ni Durano bisan kon walay nahitabong public bidding o survey aron masusi ang supplier sa wala pa sugdi ang procurement process.

Giingong si Durano nakahimo og kalapasan dihang mipirma og memorandum of agreement (MOA) tali sa PDP Digital Inc. nga nagkantidad og P2.7 million niadtong Oktubre 2008 alang sa “conceptualization and development” sa wall calendar sa DOT alang sa tuig 2009.

Si Durano gipasakaan og usa ka count sa paglapas sa Section 3 (e) sa Republic Act No. 3019 kun Anti-Graft and Corrupt Practices Act.

Sa 57-ka pahina nga decision, ang Sandiganbayan Seventh Division nga gi-chaired ni Ma. Theresa Dolores Gomez-Estoesta, nikombikto kang Durano tungod sa giingong pagpakigkunsabo tali sa bids and awards committee sa DOT aron paboran ang PDP Digital Inc.

Matod sa Sandiganbayan nga si Durano nipakita og “manifest partiality” pinaagi sa pagbaliwa sa bidding processes sa kagamhanan sa pag-award sa PDP Digital Inc. nga dunay kontratang wa moagi og competitive bidding.

Ang hukom gipakanaug pinaagi sa online proceedings niadtong Nobiyembre 26, 2021.

“Dili sad ni issue sa overpricing or ghost project. Ang issue ra gyud ang proseso gigamit sa DOT sa pag mugna sa project,” matod ni Durano.

Si Atty. Dwight Remedio, legal counsel ni Durano, nipasalig nga ilang pangitaan og legal nga remedyo ang kaso aron malimpyo ang ngan ni Durano.

Ning pagsuwat wala pa’y nadawat mga kopya sa ruling ang kampo ni Durano.

“Naghuwat pa ta sa hard copy nato sa decision since promulgation was done online and the court will send us a copy but definitely we will file a Motion for Reconsideration of the decision,” matod ni Remedio sa interbyu sa Disyembre 1.

PULITIKA GYUD?

Nagtuo si Durano nga politically motivated ang maong kalamboan, apan nagtuo siya nga dili kini makapatandog sa iyang tinguha sa pag serbisyo sa lalawigan sa Sugbo.

“Ang duha sa ilang gi-file na dismiss na. Karon 2021, human ko niingon nga modagan pagkagobernador, nitumaw na pud ni nga kaso. Murag klaro naman siguro unsay pasabot ani,” matod ni Durano sa iyang opisyal nga pamahayag.

“Kibaw naman ta unsa ni kay ako DOT secretary niadtong 2004 hangtud 2010. Gisugdan nila’g file ning mga kaso pag human sa 2016 nga election--- unom ka tuig human ko wala na sa DOT. Sunod kaso na pud gipasaka pag 2019 nga election,”matod ni Durano.

Matod niya nga di kini makabugnaw kaniya sa pagpadayon sa pagdagan.

“I said before that fighting the incumbent is like scaling Mt. Apo, and this is just one proof, naa kalit obstacle mogawas. Sa 20 yrs nga nag serbisyo ko sa gobiyerno ug sa katawhan, karon lang gyud intawon nga naa tay kaso nga nilansar ta pagka gobernador,” dugang niya.

Bisan tuod kon wa siyay gihinganlan, apan ang iyang kaatbang sa 2022 elections nga incumbent mao si Governor Gwendolyn Garcia.

NGANO GUD?

Gitambagan ni Garcia si Durano nga atubangon niini ang desisyon sa Sandiganbayan nga nagkombikto kaniya, di lang mamasangil nga ang hukom dunay pulitikanhong motibo.

“My advice to Mr Durano: Face your cases like a man. Stop whining. And certainly stop impugning the integrity of the Ombudsman and the Sandiganbayan,” matod sa pamahayag sa gobernador.

Subay niini, gi-himakak usab sa gobernador nga duna siya’y kalabotan sa kasamtangang ruling nga gi-isyu sa Sandiganbayan.

“Politically motivated? I understand the information was filed against Mr Durano sometime in 2017. And the Office of the Ombudsman filed a case against Mr Durano on March 22, 2019. I was not even governor then, on both dates. So how could it be politically motivated? By clairvoyance?,” pasabot ni Garcia.