GI-REKOMENDAR ni Jonathan “Joy” Tumulak, pangu sa City of Talisay Traffic Operations and Development Authority (CTTODA), nga i-revisit sa Konseho sa syudad sa Talisay ang ordinansa kalabot sa truck ban.
Kini ang paagi nga ma regulate ang pag-agi sa mga dumptruck sa takna nga dili kini makasamok sa sitwasyon sa trapiko ug malikayan usab ang disgrasya sa kadalanan nga naglambigit sa mga dagkong truck.
Si Tumulak nagkanayon nga angayn nga susihon sa Konseho ang mga kausaban nga ipatuman sa kadalanan human kini gipasar niadto pa sa 2012.
Sa Disyembre 3, lima ka nga indibidwal ang nangamatay sa karambolaa sa 13 ka mga sakyanan.
Ang truck ban sa syudad magsugod sa alas 6:00 sa buntag ngadto sa alas 8:00 sa buntag.
Samtang sa hapon usab magsugod sa alas 4:00 sa hapon hangtod na sa alas 8:00 sa gabii.
Apan pasabot ni Tumulak nga mas nagkadaghan na ang mga dumptruck nga moagi sa kadalanan sa syudad subay sa nagkadaghan usab nga mga proyekto sa imprastraktura ug quarry nga gitrabaho.
“Atong i recommend ug awhagon ang Council nga i revisit ang atong ordinansa unya itugyan na lang nila ang desisyon kay way back 2012 pa man ang ordinansa. Unya i compare ang gidaghanon sa sakyanan karon ug ang sakyanan way back 2012 kay lagi tungod niana, ubay-unay naman gyud ta og truck de karga diri sa dakbayan sa Talisay tungod sa nagpadayon nga proyekto diha sa international port ug quarry site diha sa Lagtang,” matod ni Tumulak sa interbyu sa Superbalita Cebu.
Gawas sa truck ban, giawhag usab ni Tumulak ang mga motorista ug drivers sa truck nga subayon ang 20 kilometer per hour nga speed limit.
Subay sa taho sa kapulisan sa syudad sa Talisay, giingong kusog ang padagan sa 10 wheeler truck ug nawad-an og kontrol ang drayber.
Hinungdan nga mi-bangga kini sa uban pang mga sakyanan nga nagsubay sab sa samang dalan./ANV