NAIMPAS ang kinabuhi sa bag-ong Amir sa Daulah Islamiyah Terrorist Group (DITG) ug upat niya nga mga sakop sa nahitabong engkuwentro tali sa Joint Task Force Central alas 2 sa kaadlawon Biyernes, Disyembre 3, 2021, didto sa Mamasapano, Maguindanao Province.

Naila ang bag-ong Amir DITG nga Asim Karinda alyas Kumander Abu Azim ug mga sakop niini nga sila Fahad Salipada alyas Naz, Hamsallah Ganoy Salangani, Salah Salipada ug alyas Tatoks.

Gibutyag ni Philippine Army's 6th Infantry Battalion Commanding Officer Lieutenant Colonel Charlie Banaag nga nakadawat sila og taho gikan sa ilang intelligence unit bahin sa presensiya sa grupo ni Kumander Azim sa Barangay Dabenayan sa nahisgutang lungsod.

Abtik nga nagpahigayon og combat operation ang Joint Task Force Central ug na-engkuwentro ang mga terorista nga milungtad og 30 minutos una miatras ang mga terorista sa dihang gi-mortar sila sa mga sundalo.

Wa hinuoy nasamdan sa bahin sa mga sundalo.

Si Kumander Azim giingong maoy mihulip kang Salahuddin Hassan, ang Amir sa DITG nga napatay usab sa engkuwentro tali sa militar didto sa Barangay Damablac, Talayan sa probinsiya niadtong Oktubre 29, 2021.

Napatay sab sa engkuwentro sa 6th Infantry Battalion si Kumander Adsam didto sa Sitio Ulangkaya, Barangay Ganta, Shariff Saydona Mustapha nga giingong nangilkil sa mga sibilyan.

Si Kumander Adsam giingong anak ni Hassan Indal, ang sub-leader sa DITG ug BIFF.

Samtang gidayeg ni 6th Infantry (Kampilan) Division Chief ug Joint Task Force Central Commander Major/General Juvymax Uy ang 6th IB ug mga sibilyan nga maoy mihatag og impormasyon sa gilubluban sa mga terorista.