MILUSAD og monitoring ang Community Environment and Natural Resources Office (Cenro) Midsayap, Cotabato Province human madiskobrehi ang panon sa mga kwaknit niadtong Huwebes, Disyembre 2, 2021.
Mismo ang mga molupyo sa Barangay Malagap, Banisilan sa nahisgutang probinsiya maoy nakakita sa daghang nga kwaknit o "large flying fox" nga temporaryong namuyo sa kalasangan sa maong barangay haduol sa dako nga langob.
Sumala kang Barangay Malagap Kapitan Carlos Benedicto nga ang mga wildlife species dili orihinal nga nagpuyo sa kalasangan (lati) sa ilang dapit. Apan nagagikan ang panon niini sa kasikbit nga dapit sa Barangay Guiling, Alamada.
Human sa pagkadiskubre sa sobra 50,000 nga kwaknit, milihok dayon si Benedicto ug gideklara niya nga protected area ang maong lugar ug ang gipuy-an sa mga kwaknit.
Sa pagsusi sa Cenro-Midsayap, sobra 50,000 ang ihap sa large flying box (Pteropus vampyrus) ug endemic nga golden-crowned flying fox (Acerodon jubatus) nga giingong nga endangered species na.
Giingon sa Cenro-Midsayap nga dako ang papel sa mga nahisgutan ekosistema o ecosystem.