USA ka laborer ang giluba sa iyang kauban sa trabaho human niya giihian didto sa NHA Resettlement Area, Barangay San Roque, New Bataan, Davao de Oro niadtong Miyerkules sa gabii, Disyembre 1, 2021.
Ang biktima giila nga si Robert Casidsid, 29, tig-harvest og kopras ug molupyo sa Purok 5, Barangay Cogonon sa maong lungsod.
Samtang ang gitumbok nga suspek nailhan nga si John Paul Guillano Neri, 30, taga NHA Resettlement Area, Barangay San Roque.
Base sa inisyal nga imbestigasyon, nasayran nga ang biktima nakigtagay og inom sa suspek didto sa iyang balay. Samtang nagtagay, naghiwa ang suspek og tabako nga gitawag og tresbe apan kalit nga giihian sa biktima.
Tungod sa kasuko sa suspek, giluba niini ang biktima gamit ang kutsilyo sa makaduhang higayon ug maayong pagkaigo sa walang abaga ug walang dughan.
Daling gidala ang biktima ngadto sa Davao De Oro Provincial Hospital pinaagi sa mga nagresponding sakop sa New Bataan Emergency Response Team.
Samtang ang suspek gikustodiya sa New Bataan Municipal Police Station sa posibleng atubangon nga kaso.