Editoryal: Kaluwasan sa kadalanan

ANG kaluwasan sa kadalanan angay nga hatagan og dakong pagtagad sa matag indibiduwal ug sa mga awtoridad.

Ang pagsunod sa mga nalatid nga sumbanan sa balaod-trapiko usa sa mga paagi aron nga malikayan ang disgrasya o aksidente.

Di na maihap ang nakalas nga kinabuhi sa bangga tungod sa pagpasagad sa uban o kaha depektong mekanikal, ug sa di maayong lakat sa panahon.

Gibuhat na ang tanan sa gobyerno aron nga mamahimong hapsay ug tunhay ang pagbiyahe sa kadalanan, apan mga sumbanan nga gihikyad giyam-iran lang sa uban hinungdan nga dunay mga disgrasya nga mahitabo.

Ang bangga didto sa may Sta. Cruz, Davao del Sur Miyerkules maoy usa sa mga ngilngig nga hitabo kay halos usa ka pamilya namatay human nga ang traysikel nga gisakyan gidaro sa depasaheroang bus.

Apil sa mga namatay ang mga bata nga nag-edad pa intawon og 2, 4 ug 7 anyos.

Dinhi sa dakbayan sa Davao, gidid-an na ang mga traysikel ug traysikad nga mobiyahe sa mga highway. Tumong aron nga malikayan ang disgrasya, ilabi na nga mga pasahero niini mga kabataan nga ginahatud ug ginakuha gikan sa mga tulunghaan.

Apan mora og gipalapos lang sa pikas dunggan ang mga pahimangno ug gipawalay bili ang balaod-trapiko kay padayon gihapon ang pagpamasada bisan kon ang peligro kanunay nga nagsunod tungod sa mga dagkong sakyanan nga naghaguros lang nga nanagan.

Kanus-a pa kaha ma-leksiyon ang mga hingtungdan aron nga motuman sa mga sumbanan nga nalatid sa balaod-trapiko?

Kinahanglan pa ba kita nga duna pay laing aksidente nga mahitabo una kita mahigmata?

Nakasabot kita nga kabahin kini sa panginabuhi sa daghang mga tawo. Apan unta ila sab nga tan-awon ang ilang kaluwasan ug sa ila mismong pasahero nga posibleng mamatay tungod sa pagpasagad.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph