DILI nato matagna ang aksidente sa dalan. Bisan kon ang usa ka motorista nagtamod sa mga lagda alang sa kaluwasan sa dalan o road safety apan, maangin kini sa ubang nagmaneho og sakyanan nga way pagpakabana. Magpatuyang sa pagpadagan bisan sentro o trapik nga dapit.

Gipahinumdoman kita makaluluoy nga hitabo kagahapon sa buntag, Disyembre 3, dakbayan sa Talisay. Dili mominos lima ka mga tawo ang namatay human gidaro sa dumptruck ang daghang sakyanan sama sa biseklita, mga motorsikko, public utility vehicles (PUVs) ug laing duha ka pribadong sakyanan.

Mga kinabuhi ang nakalas tungod sa walay pagpakabana sa uban sa kaluwasan sa dan. Sumala pa, ang dumptruck nawad-an og prino ang iyang sakyanan. Apan rason ba kini sa kagrabe sa impact sa aksidente? Tataw nga kusog kaayong ang pagpadagan sa drayber.

Gawas pa, ang pagsusi sa brake o prino usa sa mga importanteng buhaton sa drayber matag adlaw sa dili pa mobiyahe, sama sa pagtan-aw sa igong fuel o lana, level sa oil sa makina, tubig sa radiator, hangin sa mga ligid ug uban pa. Dili lang modiretso og sakay ug biyahe kay duol kini sa aksidente.

Ang mga drayber nga way seminar, matod pa, mao kanunay ang hinungdan sa nag-unang problema sa trapiko labina sa dakbayan. Usa kini sa nag-aghat sa Land Transportation Office (LTO) sa paghigpit sa rekisito sama sa sertipiko sa driving course sa pagkuha og lisensiya sa pagmaneho o pag-renew sa linsensiya gikan sa naasoy nga ahensiya.

Daghang nakasaway nga hasol kini ug dugang gasto labina sa mga kabus nga buot mokuha og lisensiya sa pagmaneho. Apan wa kitay mahimo, kabahin kini sa pagseguro alang sa kaluwasan sa kadalanan.