KINING topic mahitungod sa ihi o hugaw nga mogawas sa lawas, di kaayo himalitang mahisgutan kay lud-on o way ganahang maminaw ini. Apan kabihabalo ka ba nga ang kolor sa atong hugaw ug ihi makasulti sa kondisyon ug estado sa panglawas?

Sa akong pakighinabi ni Diane (di tinuod ngalan), naalarma ug nahadlok siya kay hapit naman nga brown ang kolor ini. Human sa makuting pakisusi ug laboratory works, nahibaw-an nga duna siyay pancreatic cancer.

Paminaw niya murag nahugno iyang kalibutan kay nagtuo man siya nga mao nay iyang katapusan.

Kining tinuoray nga kasinatian ni Diane nahitabo 13 ka tuig na ang milabay kay usa naman siya karon ka cancer survivor.

Ug wala dayon siya makadipara, posibling di sab to siya madali og tabang.

Matod sa UC San Diego Health, ang ihi 95% nga tubig unya ang nahabiling 5% mga nagsagol nga urea, chloride, sodium, potassium, creatinine, natunaw nga ions ug lain laing organic ug inorganic compounds.

Ang lasaw nga yellow sa ihi maoy labing kumon nga kolor kon himsog ang panglawas. Apan kon grabe kini ka lasaw nga halos transparent na ang hitsura, pasabot nga nag-over-hydration ang lawas. Kon kini mahitabo, ma-wash out apil ang gikinahanglang asin sama sa electrolytes nga maoy makaingon sa di balansing kemikal nga naa sa dugo.

Kon medyo timgas o lugom ang pagka-yellow pasabot nga dehydrated o nakuwangan og tubig ang lawas. Tambag sa mga doktor, inom og 7-8 ka basong tubig kada adlaw unya kadtong dunay batobato sa ilang kidney (kidney stones) angay mas daghanon ang pag-inum og tubig.

Kon dark orange o brown na gali ang kolor, posibling naay simtomas sa jaundice. Pakigkita gilayon sa mananambal aron ma-abagan.

Kon puwa o pink na gani ang kolor, pasabot nga naay dugo ang ihi. Ang tawag ini hematuria o signos nga dunay bato sa kidney, impeksyon o tumor sa may urinary tract. Posibli sab nga dunay problema sa prostate o lead/ mercury poisoning. Kung kini makita angay magpakonsulta gilayon sa doktor.