ANG Cebu City Government adunay 9,999 ka mga trabahante gikan sa regular, casual ug job order (JO).
Si Mayor Michael Rama niingon nga 85% kanila ang bakunado batok sa Covid-19 samtang, 15% ang wala pa magpabakuna, sagad JOs. Si Rama niingon nga dili ma-release ang Christmas bonus kon dili mabakunahan ang tanang kawani.
Gumikan niini, ang mayor niingon nga iyang ipapangita ang nahabilin nga wala mabakunahi aron sayran ang ilang sitwasyon sanglit seryuso siya sa iyang direktiba nga dili mahatag ang bonus kon dili mabakunahan ang tanang kawani.
Una niini, si Rama nagkanayon kadtong dili magpabakuna kay dili pa mentally ready o dili andam modawat ang ilang lawas sa bakuna kinahanglan nga moduso sila og medical certificate diin ang doktor nga mohiling kanila nagtrabaho sa public hospital.
Ang regular ug casual adunay P20,000 nga Christmas bonus samtang P3,000 ug usa ka sakong bugas (50 kilos) para sa JO.
Ang mayor wala usab nibutyag kon unsay iyang paagi sa distribution sa bonus sanglit managlahi ang estado sa pagpanarbo sa regular/casual ug JO nga usahon ba o ilahi ang paagi sa paghatag.