BISAN gisaka na ngadto sa alas 12 sa tungang gabii ang curfew sa Dakbayan sa Sugbo, daghan pa gihapon ang nangadakpan sa kapulisan nga mga tawo nga naa sa gawas nga way igong katuyoan.
Sa talaan sa Cebu City Police Office (CCPO), moabot ngadto sa 127 ang nangadakpan nga nakalapas sa curfew sa Huwebes sa gabii, Disyembre 2, 2021, bisan kon giuswag na ang oras niini sa bag-ong gipagawas nga direktiba ni Cebu City Mayor Michael Rama gikan sa alas 11:30 sa gabii ngadto sa alas 12 sa tungang gabii hangtod sa alas 3:00 sa kaadlawon.
Wa pay labot niini ang mga nadakpan sa Prevention, Restoration, Order, Beautification and Enhancement (Probe) team nga mihimo usab sa ilang operation matag gabii.
Matod ni Police Lieutenant Colonel Wilbert Parilla deputy city director for operations sa CCPO, nga moabot usab sa 36 ang nadakpan nga nakalapas sa minimum health standard sama sa wala pagsul-ob og facemask.
Gidugang ni Parilla nga nasayod na ang publiko sa bag-ong kausaban sa curfew gawas lang sa mga menor de edad nga mag sugod ang curfew sa alas 10 sa gabii hangtod sa alas 4 sa kaadlawon.
Ang mga barangay tanod ug pulis nga nadestino sa barangay ang gitahasan nga mosulod sa mga sitio aron kadtong mga batan-on nga naa pa sa gawas kinahanglang mahipos na sa dili pa mohagtok ang alas 10 sa gabii.
Giawhag sa kapulisan ang publiko nga motuman sa kamandoan sa Kagamhanan sa Dakbayan sa Sugbo sanglit alang usab kini kanila.
Ning pag-ubos sa kaso sa mga kaso sa coronavirus disease 2019 (Covid-19) dili kini angay nga kakompyasahan tungod kay mahimong mosaka og balik kon dili magpakabana ang katawhan.
Samtang hugot usab nga monitoron sa CCPO ang mga basketball court sa kabarangayan human mitugot na ang Kagamhanan sa Siyudad pagbalik sa contact sports tungod sa pag loag na sa quarantine restrictions.
Usa sa mga direktiba sa mayor ang pagtugot na sa contact sports sama sa basketball apan kinahanglan nga practice lang ug lingaw-lingaw ug dili liga.
Matod ni Parilla nga hugot nila kini nga bantayan tungod kay dili mamahimo nga kalit nalang nga ablihan ang mga basketball court kon walay pagtugot sa barangay.
Dugang niya nga adunay kamandoan ang Emergency Operations Center (EOC) nga kinahanglan nga adunay specific nga lugar nga maoy ablihan nga basketball court ug ang mo ila niini mao ang mga barangay official.
Gipahibawo usab ni Parilla nga dili mamahimo nga ang taga laing barangay moadto sa silingang barangay aron moduwa sa basketball.
Kini aron paglikay unya kon adunay mga player nga nagpositibo sa Covid-19 ngadto sa laing lugar. Samtang labot sa mga pangutana sa netizen labot sa mga tawo nga adunay gihambin sa lawas nga maoy hinungdan nga dili sila mamahimong mabakunahan kon sila tugotan ba nga makasulod, matod ni Parilla, nga dili.
Iyang gipasabot nga kadtong masakiton sigun sa direktiba sa mayor nga magpabilin sulod sa ilang panimalay gumikan kay mamahimo sila nga peligro nga matakdan sa virus.
Alang lamang sa mga bakunado na ang pagsulod sa mall inig abot sa Enero 1, 2022.
“Dili gihapon kay nakabutang man nga nga kanang dunay comorbidities dili sila allowed magsuroy-suroy, minors and pregnant women and kadtong above 65 years old nga adunay comorbidities they are not allowed nga mogawas. So the same time ni bisan kinsa nga dunay comorbidities dili gyud sila i-allow nga mosuroy unless kon moadto sila para medical check up,” matod ni Parilla.
Tungod niini, giawhag ang mga establisemento nga karon pa lang ila lang pahibaw-on ang ilang mga customer nga sa sunod buwan ila nang ipatuman ang lagda nga gipagawas sa Kagamhanan sa Dakbayan sa Sugbo.