ANG Cebu City Government ni-release na sa financial assistance sa Biyernes, Disyembre 3, alang sa gatusan ka mga tag-iya og balay nga nasunog sa sityo Lawis, Barangay Mambaling, Dakbayan sa Sugbo.

Si Portia Basmayor, pangulo sa Department of Social Welfare and Services (DSWS), niingon nga sa final listing sa ilang buhatan, niabot og 568 ka mga balay ang nasunog, 25 niini partially damaged.

Ang mga house owner kansang balay naugdaw ug nakan-an sa kayo nakadawat og tag P20,000 gikan sa quick response fund ilawom sa Cebu City Disaster Risk Reduction and Management Office (CCDRMO).

Si Cebu City Mayor Michael Rama nibisita sa mga nasunogan kagahapon, Disyembre 3, sa hapon dala ang P15.7 milyones nga ayuda alang sa mga nasunogan nga giapud-apod sa Mambaling Elementary School ug San Roque church sanglit dako ang area ug dili puno sa mga tawo. /