Usa kami ka henerasyon kaniadtong unang katuigan sa 1970-80. Mao kini ang katuigan nga naglisod na og sustenir ang diktaduryang Marcos sa ekonomiyang nagsalig lang sa dagkong utang.
Brayt man si anhing presidente Ferdinand Marcos, ang amahan sa nilansar karon nga si Marcos Jr. Naa untay mga propesyonal nga nagdumala sa ekonomiya nga sila si Cesar Virata. Apan mayabag gyud ang dagan kay naghari man ang mga kurakot nga barkada sa mga Marcos nga ginganlan og crony.
Ug aron mapadayon ang naghibat na nga sistema, nitugot kintahay ang Marcos og eleksyon aron makapanghambog siya nga naay demokrasya. Apan dungan niini ang mabangis nga pagpanglugpit ug paggukod sa mga tinuod nga kaatbang sa pulitika.
Gani, una nakong nasinati mao kadtong dispersal sa usa ka prayer rally nga gipangulohan nilang Fr. Rudy Romano. Gipahigayon ang maong kalihokan isip selebrasyon sa Human Rights sa Disyembre 1979.
Igo lang kaming nangadye nga nag-prosesyon gikan sa hawanan atubangan sa simbahan sa Redemptorist padulong sa Fuente Osmeña.
Gisugat kami og mga anti-riot police. Nakaligo gyud ko sa tubig sa bombero. Ilang gidakop si Fr. Romano.
Maayo kay ang abogado nga si Pepe Diokno, anhing amahan ni Chel Diokno, maoy among guest speaker sa prayer rally didto sa hawanan sa Redemptorist Church. Naabot na siya sa airport sa Mactan dihang nadawat niya ang balita sa dispersal ug pagkadakop ni Fr. Romano.
Wa na siya mosakay balik sa Manila. Dali siyang nibalik sa Syudad sa Sugbo ug nideritso sa Ramos Police Station. Niadtong tungora, kaming mga nabasa og tubig niapas ug nagpahigayon og rali atubangan sa maong estasyonan sa kapulisan.
Lawom na sa gabii diin nigawas si Diokno kuyog ni Fr. Romano. Dako kaayo ang among kalipay.
Bangis
Usa kini sa mga panghitabo kaniadtong panahon sa diktador. Apan duna pay daghang mga bangis nga panghitabo.
Wa pa ko malimot sa mga Freedom March nga gipangulohan nilang Inday Nita Cortes-Daluz. Mao kadtong higayon nga sila si Zamboanga Mayor Cesar Climaco gidakop mismo diha sa Fuente Osmeña kay nisalmot sa maong masang aksyon.
Gidakop ang mag-amahang si Dodong ug Joeyboy Holganza nga mga lider sa oposisyon dinhi sa Sugbo. Gilakip sa pagpriso nila si Nene Pimentel, ang lider sa oposisyon didto sa Mindanao. Halos tanang Pilipino nakahibawo sa pagpatay ni Ninoy Aquino.
Kay naapil na man ko sa pag-organisa sa lain-laing mga lihok protesta sa Sugbo labi na ang duha ka mga welgang bayan, apil ko nga gidakop sa mga student leaders nga nagkapundok sa Syudad sa Lapu-Lapu kaniadtong 1984.
Ug pagka Hulyo 11, 1985, gidakop sa mga sakop sa military si Fr. Rudy Romano ubang kang Levi Ybañez. Hangtod karon, wa pa gyud kita makakab-ot og hustisya.
Marcos Jr.
Ang 2022 dili lang usa ka election year diin nilansar ang Bongbong Marcos kun si Marcos Jr. Mao kini ang ika-50 ka tuig sukad nga gipahamtang ni Marcos Sr. ang balaod militar kun martial law.
Ang pagseguro nga mapildi ni Marcos Jr. sa iyang tinguha nga mobalik ang iyang pamilya sa Malakanyang mao ang labing dakong hagit karon sa among henerasyon.
Nalipay ko nga daghan nang mga batan-on nga nakaamgo sa tinuod ug wala madala sa mga bakak sa mga Marcos’ loyalists ug ilang mga trolls.
Ug mao kini ang akong rason nganong moaktibo ko sa Campaign Against the Return of the Marcoses and Martial Law kun CARMMA. Gitukod kining maong grupo dihang nidagan si Marcos Jr. alang sa pagka bise presidente. Salamat nga napildi siya.
Karon, nangambisyon na gyud nga magpresidente. Atong pildihon siya pag-usab. (DM nako sa @anol_cebu)