Usa ka traysikol ang labing ulahing biktima sa nagpadayong drainage project sa dakbayan sa Lapu-Lapu dihang nahulog sa gikawot nga bahin sa Barangay Bankal, Biyernes, Disyembre 3, 2021.
Matod ni Mario Napuli, officer-in-charge sa City Traffic and Management System Office (CTMS) nga ang tuo nga ligid sa traysikol naigo sa babag nga naglibot sa gikawot nga lugar nga niresulta nga nawad-an siya og kontrol ug nahulog sa lungag.
Sa pakighinabi sa Sunstar Cebu, si Napuli namahayag nga ang drayber nakaangkon og menor nga samad sa ulo samtang ang iyang bugtong pasahero nahiagom og gagmay nga mga bun-og sa lawas.
Dugang pa ni Napuli nga kinahanglang magbutang og dugang early warning devices ang mga kontraktor sa proyekto aron mapahibalo ang mga motorista sa nagpadayong construction sa maong lugar.
Giawhag usab sa kadagkuan sa traffic management ang mga motorista nga mogamit og alternatibong mga rota aron malikayan ang mga gikawot nga lugar.
IKALIMA NA
Sa buwag nga pakighinabi, si Bankal Barangay Captain Eduardo Cuizon niingon nga kini ang ikalima nga aksidente nga nahitabo sa barangay nga naglambigit sa drainage project.
Si Cuizon namahayag nga iyang ipatawag ang contractor tungod sa sunod-sunod nga disgrasya sa proyekto nga nagpadayon sulod sa kapin sa usa ka tuig ug mahuman unta niadtong Hulyo ning tuiga.
“Dili lang unta kwarta ang ilang gi apas, ilaha pud unta siguroon ang serguridad sa lumalabay sa karsada nga dili ma disgrasya tungod sa ilang trabaho,” matod ni Cuizon.
Gisaway usab sa kapitan sa barangay ang Department of Public Works and Highways (DPWH) sa pagtugot sa kontraktor nga maka-operate bisan og nalapas na niini ang gitakdang deadline sa kontrata.
“If the DPWH is allowing contractors even if they already behind schedule, there is something wrong with it,” matod ni Cuizon.
Ang groundbreaking ceremony sa P46.4 million Basal-Cagudoy-Bankal-Buaya road and drainage project gipahigayon niadtong Nobyembre sa 2020.
Pipila ka mga adlaw ang nakalabay, usa usab ka motorista ang nahulog sa gitrabahong drainage project sa Bagumbayan 2, Maribago nga iya sa Department of Public Works and Highways (DPHW).
Daghan nang mga sakyanan ug motorista ang nangahulog ning mga proyektoha, apan way aksyon nga gihimo.