COTABATO CITY - Wa mikompiyansa ang militar sa giingong plano sa mga terorista nga ipanimalos ang kamatayon sa ilang lider ug mga kaubanan sa nahitabong engkuwentro sa miaging adlaw.
Unag napatay sa engkuwentro batok sa tropa sa 6th Infantry Battalion, Philippine Army si Adsam Indal, anak ni Kumander Hassan Indal sa Daulah Islamiyah Terrorist Group (DITG) ug Bangsamoro Islamic Freedom Fighters (BIFF) didto sa Sitio Ulangkaya, Barangay Ganta, Shariff Saydona Mustapha, Maguindanao Province.
Sa ikaduhang combat operation sa 6th IB sa pagpangulo ni Lieutenant Colonel Charlie Banaag, napatay sab sila Asim Karinda alyas Kumander Abu Azim, bag-ong Amir sa DITG ug mga sakop niini nga sila Fahad Salipada alyas Naz, Hamsallah Ganoy Salangani, Salah Salipada ug alyas Tatoks didto sa Barangay Dabenayan, Mamasapano sa nahisgutang probinsiya.
Giingong si Kumander Azim ang mihulip kang Salahuddin Hassan isip Amir sa DITG nga napatay usab sa engkuwentro sa militar didto sa Barangay Damablac, Talayan niadtong Oktubre 29, 2021.
Giklaro ni Banaag nga nagmalampuson ang ilang operasyon gumikan sa mga sibilyan nga nagpaabot og impormasyon sa gilubloban sa mga terorista.
Hinuon gipaneguro ni 6th Infantry (Kampilan) Division Chief ug Joint Task Force Central Commander Major General Juvymax Uy nga gipalig-on pa nila ang seguridad sa probinsiya, uban ang puwersa sa kapulisan may kalabutan sa bahad DITG ug BIFF nga manimalos.