PADAYON pang gisubay sa kapulisan ang hinungdan kon nganong naghuramentado ang usa ka mag-uuma ug gipatay ang iyang asawa ug duha ka mga anak pinaagi sa pagluba alas 9 sa gabii niadtong Biyernes, Disyembre 3, 2021, sa Barangay Kablon, Tupi, South Cotabato.
Giila ang mga napatay nga sila Beverly Dinal, 27, iyang mga anak nga sila Shelton, 5, ug Peter 2.
Samtang human napatay sa suspek nga si Allan Dinal, 37, ang iyang pamilya nag-unay sab siya og dunggab sa kaugalingon ug namatay.
Sa taho gikan sa kapulisan sa Tupi Municipal Police Station, nasayran nga nakadungog na lang ang mga silingan og kasaba sa balay sa magtiayon nga nagkalalis unya taud-taod nagsininggitay nga nangayog tabang.
Sa dihang gisusi sa mga silingan ang balay sa pamilya, ilang nadiskubre nga naligo na sa kaugalingong mga dugo ang mga biktima ug ang suspek tungod sa mga samad nga naangkon.
Gidala ang mga biktima ug ang suspek ngadto sa Tupi District Hospital, apan silang tanan gideklara sa mga doktor nga dead on arrival gumikan sa nahiagumang daghang mga samad sa lawas.
Saysay sa mga silingan nga sa wala pa ang insidente, kanunay nilang madunggan ang magtiayon nga maglalis ug niadtong Biyernes, ila na lang nadiskobrehan ang linuog ang panghitabo.