IMBIS nga mga patay nga lawas ang gikalot sa militar, mga armas ang nakubkob sa giingong gilubong sa New People's Army (NPA) alas 11:15 sa buntag niadtong Sabado, Disyembre 4, 2021, sa Esperanza, Sultan Kudarat.
Gibutyag ni 6th Infantry (Kampilan) Division Chief ug Joint Task Force Central Commander Major General Juvymax Uy nga nagpatrolya lamang ang mga sakop sa Alpha Company sa 7th Infantry (Tapat) Battalion sa Philippine Army nga gipangulohan ni 1st Lieutenant Sonny Telino didto sa Purok 3, Barangay Marguez sa nahisgutang lungsod apan ilang namatikdan ang bag-o lang nga kinalot nga yuta nga daw dunay gilubong.
Sa pagtuo nga mass grave sa mga NPA, gikalot kini sa mga sundalo.
Apan dili mga patay sa lawas sa tawo ang ilang nakubkuban kon di ang 34 ka mga nagkadaiyang klase sa tag-as nga matang sa armas.
Dako ang pagtuo ni 7th IB Commander Lieutenant Colonel Romel Valencia nga gipangtago sa mga rebelde ang ilang mga armas sa walay puas nilang combat operation.
Sinyales sab nga gusto na og kalinaw sa ubang sakop sa NPA kay gipanglubong na lang ang ilang mga armas.
Kahinumdoman nga gatusan na ka NPA ang misurender sa militar sa probinsiya sa Sultan Kudarat.
Samtang gidayeg ni Uy ang 7th IB sa daghan nilang kalampusan sa ilang area of responsibility.
Nanawagan sab si Uy sa mga NPA ug ubang nga armadong grupo nga mobalik na sa sabakan sa balaod ug manginabuhing malinawon.