Radaza nasagmuyo sa mga opisyal sa Barangay Caw-oy; Kapitan mipasabot

GIKASAGMUYO ni Lapu-Lapu City lone district Representative Paz Radaza ang wala pagtunga sa bisan usa ka barangay official sa Barangay Caw-oy atol sa pag turn-over sa ilang bag-o nga health center sa barangay niadtong Biyernes, Disyembre 3, 2021 sa Barangay Caw-oy, Isla sa Olango.

“Naguol ko para sa katawhan sa Barangay Caw-oy human sa gipakita nga batasan sa mga barangay officials. Sila unta ang example sa maayong pang gobyerno ngadto sa katawhan apan subo pamalandungon nga walay bisan usa nitunga nila,” matod ni Radaza.

Gipasabot ni Radaza nga ang pag turnover sa P2.5 million, two-storey building nga health center alang kini sa katawhan sa Barangay Caw-oy ug dili sa elected officials busa angay lang nga dunay presensya nila sa pag turn over kay sila ang gisaligan sa katawhan nga leader sa barangay.

“Ngano man nga nagdumili mo sa pagdawat sa mao nga proyekto ing-ana ba lang mo kabastos nga ultimo sa inyong constituents wa mo’y mga respeto, bisan para lang unta sa inyong mga lumolupyo nga maoy nagbutang ninyo diha sa inyong tagsa ka position,” tipik sa pamahayag ni Radaza.

Matod sa mga lumolupyo nga nitambong sa mao nga turnover nga ang ilang barangay officials gipatawag ni Mayor Junard Chan ug gitapok ngadto sa usa ka dos andanas nga building nga duol ra sa health center alang sa usa ka meeting.

Tungod kay wala may presensya sa barangay officials ug health workers atol sa turnover, ang mga lumolupyo nga mitunga sa selebrasyon, midawat sa yawe isip simbolo nga pormal nga na-turnover ang edipisyo.

“Para man unta ni sa katawhan, dili man ni para akoa apan gihimo nilang makaluluoy ang ilang kaugalingong barangay ug katawhan,” matod ni Radaza.

‘DI TINUOD’

Apan si Barangay Captain Rolando Amorin nanghimakak nga diha sila sa isla atol sa turnover.

Matod sa kapitan sa interbyu sa Superbalita Cebu niadtong Sabado sa gabii, Disyembre 4, silang tanan nangadto sa mainland aron makigkita kang Chan aron madali ang paghikay sa P400,000 nga ilang gipangayo sa mayor sa panudlanan sa Siyudad.

Ila kining gipangayo alang sa yuta nga tukoran sa bag-ong barangay hall ug sa edipisyo mismo.

Nagdali sila tungod kay gitagalan sila og adlaw sa Bureau of Internal Revenue (BIR) sa paghikay sa bayad sa yuta.

Matod niya nga wa silay tumong sa di pagtambong, apan naatol lang kini sa mas importanteng butang.

Ila usab nga gibasol ang kontraktor nga nagsige og uswag sa turnover.

Gitataw ni Amorin nga dugay rang gi-turnover sa kontraktor ang health center, apan wa nila kini gamita kay way klarong supply sa tubig.

AYUDA

Sa laing bahin, mihatag og P100,000 si Radaza alang sa 41 ka mga mananagat sa Barangay Caw-oy gikan sa iyang personal nga panudlanan.

Human nasayran ni Radaza nga galisod ang mga mananagat sa ilang kita sa pagpanagat, iya kining gihatagan og puhunan para sa pagpalit sa ilang kaugalingong panggal nga maoy magamit nila aron makakuha og ubay-ubay nga isda ug bahinon kini sa grupo.

Nanghatag si Radaza og tag tulo ka kilo nga bugas ngadto sa 134 ka mga residente sa susama nga barangay diin mga asawa usab sila sa mga mananagat. (REV gikan sa PR)