MGA pasahero sa Consolacion ug Liloan, ingon man sa dakbayan sa Sugbo, makapaabot og mas komportable nga sakyan human gilusad ang 15 ka modernong public utility jeepneys (PUJ) sa kasikbit nga mga lungsod sa miaging semana.
Kini wala pay duha ka semana human gilusad ang 26 ka modernong mga PUJ sa silingang dakbayan sa Lapu-Lapu.
Gilusad sa Consolacion Transport Corp. ang 10 ka modernong PUJ ubos sa PUV Modernization Program (PUVMP) sa JM Compound, Mandaue City niadtong Miyerkules, Disyembre 1, 2021, pahibawo sa Land Transportation Franchising and Regulatory Board Central Visayas (LTFRB 7).
Ang bag-ong mga PUJ mobiyahe sa rota sa Consolacion ug Cebu City.
Ang mga sakop ug opisyal sa Consolacion Transport Corp. pinangulohan sa ilang chairman, Rosaulo Danuco, nipadayag sa ilang pagpasalamat sa mga ahensya sa gobyerno ug pribadong institusyon nga ningtabang sa ilang transport cooperative nga makaangkon sa ilang bag-ong mga sakyanan ubos sa PUVMP.
Sa samang adlaw, lima ka modernong mga PUJ ang gilusad sa Liloan Operators Multi-purpose Cooperative o Lodtramco sa bag-ong Liloan Public Market, matod sa LTFRB 7.
Kini nga mga unit mobiyahe sa rota sa Liloan-Cebu City.
Niadtong Nobiyembre 18, gilusad usab sa Cebu Mepza Liloan Drivers and Operators Cooperative ang 26 ka modernong PUJ sa dakbayan sa Lapu-Lapu alang sa kaayohan sa mga sumasakay sa dakbayan sa Lapu-Lapu, Consolacion ug Liloan.
Ang PUVMP, usa ka flagship program sa Duterte administration, nagtinguha sa paghatag og moderno, environment-friendly, komportable ug luwas nga public transport system sa nasod.
Nagsugod kini niadtong tunga-tunga sa 2017 sa tumong nga wagtangon ang tradisyunal nga mga jeepney, bus ug uban pang public utility vehicles nga nag-edad og labing menos 15 anyos ug pulihan sa mas komportable ug environment-friendly nga mga sakyanan sulod sa tulo ka tuig.
Apan ang coronavirus pandemic nakababag, nga nagpalugway sa pagdagan sa daghang tradisyonal nga mga jeepney.
Ang programa nag-awhag sa gagmay nga mga magdudula sa industriya sa transportasyon sa paghiusa ug pagporma sa mga kooperatiba o mga korporasyon.
Gitugyan niini ang pagplano sa ruta ngadto sa mga local government units.
Aron matabangan ang mga transport operator nga makapundo sa pagpalit sa mas dagko ug mas modernong mga sakyanan nga mailisan, nga gibanabana nga mokantidad ug labing menos P1.4 milyones matag usa, usa ka subsidy ug loan program sa gobyerno ang gilakip sa programa.