GIPUKAW sa sipa nga butobuto sa armas ang taga Ocampo Drive, Barangay Inayawan, siyudad sa Sugbo kagahapon, Disyembre 5, sa alas 5:30 sa buntag. Tulo ang patay dihadiha.

Nadawat sa Pardo Police Station ang tawag sa telepono nga adunay nahitabong pagpamusil sa maong barangay ug naabtan pa sa kapulisan ang mga lawas sa mga biktima nga nagbuy-od.

Giila ang mga gipamusil nga sila si Jake Fernandez Bas alyas Adoy, 26; Ernie Gasalatan Sales alyas Tata, 39; ug Mark Aventurado alyas Macmac, 16, pulos nagpuyo sa maong dapit.

Sa inisyal nga imbestigasyon sa Pardo Police Station, duha ka wala mailhing tawo ang ningsulod sa balay ni Sales ug walay daghang istorya, gipamusil ang mga biktima sa makadaghang higayon.

Si Adoy nakahigayon pa unta sa pagsibat sa balay bisan samaran ug nitago sa silingang balay, apan nakabsan gihapon kini sa kinabuhi tungod sa mga samad niini sa lawas.

Dali nga misibat ang mga mamumuno nga sakay sa usa ka motor sa wala matino nga direksyon.

Daling giproseso sa mga sakop sa Scene of the Crime Operatives ang sulod sa balay diin nakakuha silag daghang basiyo sa bala nga wala pa masayri unsa nga kalibre sa armas ang gigamit.

Matod ni Police Major Jose Angelo Acupinpin, hepe sa Pardo Police Station, panimawos ang usa sa motibo sa krimen sanglit ang grupo ni Jake Fernandez Bas ang gipasanginlan nga maoy responsable sa sunodsunod nga pagpamusil sa Inayawan sa milabay nga mga adlaw.

Wala usab nila wad-a ang laing posibilidad nga kini away sa negosyo sa illegal nga drugas sa dapit diin nag‑ unay-unay na ang mga drug personality sa Inayawan.

Giingong grupo ang tulo nga nalambigit sa illegal nga drugas ug sila, matod pa, ang tahasan nga mobira sa drug personalities nga dili makabayad.

“Involve sila sa drugs at the same time, ni-engage na pud silag gun-for-hire kay base sa among information, si Adoy maoy kontakon sa drug personalities nga naa sa atong prisohan. For example, naay dili kabayad sa ilahang grupo sa ingon ana kini si Adoy maoy mosingil unya og dili kabayad, siya pud ang mopatay,” matod ni Acupinpin.

Sigon sa nakuha nga kasayuran sa mga imbestigador sa dapit, gikahadlokan, matod pa kini si Adoy sa tibuok Inayawan, tungod sa iyang pagkabagis ug naila nga mamusilay.

Migawas ang pangalan ni Adoy sa milabay nga mga semana ilabi na nga siya ang gitudlo nga responsabli sa pagpamusil sa Inayawan apan naglisod sila sa pagdakop niini tungod kay magbalhinbalhin kini og puyo.

Dili usab mokooperar ang mga residente sa Inayawan kon asa magtagotago si Adoy tungod kay mahadlok nga balikan o panimaslan sa grupo niini.

Sa pagsuwat ning balita, nagpadayon pa sa ilang imbestigasyon ang Pardo Police Station kon kinsa ang duha ka mamumuno. (AYB / GPL)