MITIBUGSOK sa 16.41 porsiyento ang crime volume sa Central Visayas (CV) sulod sa milabayng duha ka buwan sa bag-ong liderato sa Police Regional Office (PRO) 7.
Sa labing bag-ong datus sa PRO-7 Crime Information, Reporting and Analysis System (CIRAS) base sa Nobiyembre 29, 2021, nakatala ang kapulisan og 1,283 ka krimen sulod sa duha ka buwan gikan sa Septiyembre 29 ngadto sa Nobiyembre 28, 2021 itandi sa susamang buwan sa 2020.
Makita dinhi nga miubos og kapin sa 16 porsiyento ang crime statistics sa Central Visayas. Kini tungod sa nagkahiusang paghingusog sa tanang police units sa PRO 7.
Samtang, ang kahimtang sa kahusay ug kalinaw sa tibuok rehiyon miubos usab kinig 26.26 porsiyento nga nagpasabot malinawon ug luwas nga puy-an ang mga dapit sa Central Visayas.
Gipasigarbo ni Police Brigadier General Roque Eduardo Vega ang malampuson nga anti-drug operations diin nakasikop silag 1,242 ka drug personalities.
Sa maong operation mi resulta usab sa pagkasakmit sa kapin 19 kilos sa gituohang shabu nga adunay balor nga P130.6 milyon ug 89 ka kilong marijuana nga mokantidad sa P10.6 milyon.
Sa kampanya batok sa illegal nga sugal, wala usab kini magpaulahi tungod kay nakadakop silag 2,483 ka mga sugarol sa 931 ka operations diin nasakmit nila ang P P258,431 gikan sa illegal nga sugal.
“Your BisdaK cops will continue to intensify our flagship programs in the region. Aligned with the CPNP’s mandate, it is expected that commanders down to station commanders, to predict and plan amid the new normal and forthcoming yuletide season,” matod ni Vega.
Ning panahon sa holiday seasons, mimando si Vega sa tanang city ug provincial police directors nga hingusgan ang police visibility patrol sa business establishments.