DILI ikalimod nga dako kaayo og epekto ang pandemiya sa ekonomiya. Makasabot kita daghang pribadong kompaniya dili makahatag sa ilang naandang bonus sa Pasko, gawas sa government mandated nga 13th month pay.

Busa makaibog paminawon ang mga pamahayag sa daghang lokal nga kagamhanan sa ilang pahibalo sa dagkong bonus. Ubang mga trabahante makaingon na lang nga ‘sana all.’

Sama sa gipahibalo ni Toledo City Mayor Marjorie “Joie” Perales atol sa inagurasyon sa bag-ong giayo nga Toledo Public Plaza niadtong Nobiyembre 29, Lunes.

Matod niya, ang 500 regular employees ug 2,000 job order (JO) workers makadawat og bonus nga katugbang og duha ka buwan sa ilang suweldo. Dugang P30,000 isip Christmas bonus sa regular employees ug P5,000 nga gratuity bonus sa JOs. Pagkanindot apan nahisubay ba kaha kini sa pagtugot sa balaud?

Sa dakbayan sa Sugbo, si Mayor Michael Rama nisaad usab og dakong bonus sa mga regular nga kawani nga balor og P20,000 gawas sa naandang bonuses ug P6,000 sa mga JO ubos sa kondisyon nga nagpabakuna na batok sa Covid-19.

Sa pikas bahin, samtang naghisgot ang mayor og bonus, ang ubang JOs sa dakbayan sama sa Barangay Peace-Keeping Action Team (BPAT) wala pa makadawat sa ilang suweldo sulod na sa tulo ka buwan. Paeta sad. Gamit ra ba kaayo kini sila sa mga kalihokan sa dakbayan. Nasayod ba kaha ang mayor niini? Kamaayong ilisan ang nagdumala sa grupo.

Samtang, dili lang ang Toledo ug dakbayan sa Sugbo ang ningpahibalo og dugang bonus sa ilang mga kawani sa Pasko. Halos tanang local government units (LGUs).

Igo na lang sa kaibog ang uban labina sa mga trabahente sa pribadong kompaniya. Manghupaw na lang sa pag-ingon nga ‘sana all.’