DI ikalimod nga ang Cebu City Hall nahimong usa ka dakong employment agency. Kaniadto mikabat lang sa kapin kon kuwang 5,000 ang mga kawani sa City Hall. Apan karon, miabot na diay sa 9,999 ka mga empleyado. Usa na lay kuwang para ma 10,000 ang tanan.

Apan makaingon ta nga tungod niini, dako og natabang ang City Hall sa panahon sa Covid-19 pandemic. Tungod sa istrikto nga kurintinas aron pagpugong sa pagkatap sa coronavirus, daghang mga kompaniya ang nanira. Daghan ang mga empleyado ang nawad-an og trabaho.

Apan di nato maklaro kon kadtong nawad-an og trabaho sa pagpanira sa mga kompaniya mao ba usab ang nakatrabaho sa City Hall. Ang klaro mao nga ang nakatrabaho sa City Hall mao kadtong supporters sa administrasyon.

Agresibo si Cebu City Mayor Mike Rama sa pagbakuna batok sa Covid-19 sa mga kwalipikado nga residente sa siyudad. Apan angay nga unahon ang mga kawani sa City Hall. Duna pay 1,547 ka mga kawani sa kagamhanan sa siyudad nga wa pa mabakunahi.

Ang wa mabakunahi, kasagaran kanila nagtrabaho ubos sa job order basis, mokabat sa 15.47 porsiyento sa 9,999 ka mga kawani sa kagamhanan sa siyudad. Apan miabot na sa 8,452 o 84.52 porsiyento sa mga kawani ang nabakunahan.

Unsay mahitabo sa wa mabakunahi? Si Rama niingon nga kadtong mga kawani nga wa mabakunahi di na maka-report sa trabaho sugod sa buwan sa Enero sa sunod tuig. Ug tungod kay job order workers, maigo sila sa no work, no pay. Sa ato pa, way trabaho, way suweldo.

Matod pa ni Rama, iyang pangitaon ang mga kawani nga wa pa magpabakuna ug iyang pangutan-on kon unsa ang rason nganong wa pa sila mabakunahi. Tungod tingali kana sa kahadlok sa injection o sa kahadlok nga mahimo silang mga zombie.

Sa nahaunang pamahayag, si Rama miingon nga ang City Hall andam mohatag og bonus nga P20,000 sa matag kawani nga regular ug casual. Nisugyot usab siya sa paghatag og bonus nga P6,000 ug usa ka sakong bugas humay sa kada job order employee.

Apan, mohatag siya og bonus kon mabakunahan ang tanan nga mga kawani sa City Hall. Di tingali ni maayo kay maamong man ang mas daghan nga nabakunahan sa pipila ka mga kawani nga wa mabakunahi. Kadtong wa mabakunahi mao ray di patrabahuon ug way bonus.