ANG gikabalak-an sa kadaghanan sa katawhan karon, labina ning atong pagsaulog sa Pasko karon, mao ning Omicron, ang bag-o nga variant sa makamatay nga coronavirus kon Covid-19. Namatikdan ning Omicron didto sa South Africa ug gipahibawo dayon sa World Health Organization (WHO) ang tibuok kanasuran. Matud pa, mas dali ning makatakod ang Omicron kay sa Delta variant.
Tungod sa Omicron variant, ang tanan nasud nagdili na sa mga biyahero o turista nga gikan sa South Africa nga makasulod sa tagsa-tagsa ka nasud. Dinhi sa atong nasud, dali usab nga mipagawas og orden si Presidente Rodrigo Duterte pinaagi sa InterA-Agency Task Force (IATF) sa pagdili sa mga turista gikan sa South Africa. Ang makasulod kadto lang atong mga kaigsoonan Filipino nga nagtrabaho sa gawas ug ang mga Filipino nga mouli na sa atong nasud.
Ang morag dili madawat sa kadaghanan, labina kadtong mga madudahon, tungod kay naatol man ang paglutaw aning Omicron sa panahon nga ang tanan kanasuran, labina dinhi sa atong Pilipinas, nga ang mayoriya mga Kristiyano, nga magsaulog sa Pasko sa pagkatawo ni Hesukristo.
Unya, bisan pa sa pagtumaw aning Omicron variant karon, naa pa gihapon ang Probinsya sa Cebu, kalungsoran, Metro Cebu, ug sa uban dapit ubos sa Alert Level 2 diin gitugtan na ang katawhan nga makagawas sa ilang tagsa-tagsa ka panimalay ug makasuroy na bisan asa lakip na ang mga edaran ug mga bata basta kuyog ang ilang mga ginikanan o yaya.
Ang problema karon sa atong kagamhanan kay bisan pa sa kadaghan na sa bakuna nga miabot gikan sa Pfizer, AstraZeneca, Moderna, Sinovac ug uban pa, daghan pa gihapon ang wala pa mabakunahi tungod kay nahadlok o di ba gahi lang gyud og mga ulo unya gigamit ang ila kunohay katungod nga dili magpabakuna.
Naa say mga kongresista ug senador nga basin tungod sa umaabot nga piliay sa Mayo 9, 2022, mibabag sa plano sa Malakanyang nga himuon nga pugsanay o mandatory ang pagpamakuna batok sa Covid-19 sa tanan tawo. Tan-awa, nagsugod na lang ang giingon nga booster dose sa mga katigoriya nga A1, A2 ug A3, apan naa pay daghan nga nagpadili-dili nga magpabakuna.
Samtang gidili sa IATF-Department of Health (DOH) ang Christmas party bisan og naa pa ta Alert Level 2, apan dili kalikayan ang pagsaulog sa Pasko labina sa mga kumpaniya, dagko o gamay, nga naandan na nga dunay Christmas party matag Disyembre. Hinuon, iya na nga bago unya sa management sa pagpangita og paagi nga malikayan ang pagtapok sa daghan tawo.
***
Sa laing bahin, kalit man nga milubad ang tuno ni Manila Mayor Isko Moreno, nga kandidato pagka presidente ubos sa Aksyon Demokratiko Party, samtang didto siya sa dakbayan sa Lapu-Lapu atol sa iyang pakighimamat sa mga botante. Matud pa ni Isko, iyang suportahan ang kandidatora ni Presidente Duterte pagka senador. Tungod ba kini nga dunay hungihong nga siya ang dalhon ni Presidente Digong nga kandidato pagka presidente kon modayon og atras si Senador Bong Go, nga kandidato pagka presidente ubos sa PDDS?
Gisulti na ni Senador Go nga moatras siya sa iyang kandidatora pagka president apan hangtud karon, wa pa gyud siya moadto sa Comelec aron pagdokumento ug pagmatuod sa iyang gisulti. Laing na pud nga drama?