KIDAPAWAN CITY -- Tumbok na ang mga suspek nga giingong nagpusil patay sa delivery boy sa liquefied petroleum gas (LPG) alas 4:05 sa hapon niadtong Dominggo, Disyembre 5, sa dakbayan.
Giila ang biktima nga si Dionesio Enaje Jr., 52, minyo ug molupyo sa Barangay Lanao sa nahisgutang siyudad.
Sa imbestigasyon sa Kidapawan City Police Station, nasayran nga nagmaneho ang biktima sa delivery tricycle nga maghatud unta og LPG sa ilang kustomer.
Apan pag-abot niya sa Baroy Street, Barangay Lanao sa siyudad, dunay miatang nga duha ka wala mailhing mga tawo ug nagpusil kaniya gamit ang kalibre .45 nga pistola.
Abtik sab nga miikyas ang mga suspek paingon sa sentro nga bahin sa dakbayan.
Daling gisapupo si Enaje sa Rescue 911 ug gidala ngadto sa Kidapawan City Hospital apan gideklara kini sa doktor nga dead on arrival human makaangkon og samad sa ulo ug likod nga parte sa lawas.
Hinuon, giingong mga pulis sa Kidapawan City duna nay mga persons of interest nga giimbestigahan sa maong krimen.