KIDAPAWAN CITY -- Mohatag og libre nga pagkaon ang Department of Education (DepEd)-Soccsksargen sa mga tinun-an nga apil sa limitado nga face-to-face classes sa Rehiyon 12 (Soccsksargen).
Kini ang gikompirma ni DepEd-Soccsksargen Information Officer Antonio Maganto.
Matud ni Maganto nga naggahin og oras ang DepEd sa paghatag og mga pagkaon sa mga magtutungha aron dili na mogawas sa ilang lawak-tulunghaan.
Nagpasalamat usab si Maganto sa mga pribadong indibiduwal ug stakeholders nga nanghatud sab og hinabang sa pipila ka tunghaan sa rehiyon.
Tungod niini, gisulti sa DepEd nga abri ang ilang buhatan alang niadtong mga tawo nga dunay malumo og kasingkasing nga gustong mohatag og hinabang alang sa pagpakaon sa mga kabataan.
Samtang tutukan sab sa ahensiya ang pipila ka mga pamaagi aron mapalambo pa ang pagpatuman sa limited face-to-face classes.
Hinuon, hugot sab nga ipatuman ang minimum health protocols batok Covid-19 sa tanang tulunghaan sa rehiyon nga nagsugod na sa ilang face-to-face classes.