GIKOMPIRMAR ni Jonathan Tumulak, hepe sa City of Talisay Traffic Operations Development and Authority (CT-TODA) nga overspeeding ang hinungdan sa pagkadisgrasya sa 10-wheeler truck nga nidaro sa lain pang mga sakyanan ug motorsiklo sa N.Bacalso Avenue, Brgy. Lawaan 3, Dakbayan sa Talisay.
Kini subay sa gipahigayon nga black spot investigation sa buhatan kauban sa Traffic Police sa syudad sa Talisay.
Matod ni Tumulak nga subay sa ilang pagsusi, wa silay nakitang pag leak sa brake fluid sa sakyanan nga maoy timailhan sa pagkagar sa break. Wala silay nakita nga inagian sa bagnus sa ligid sa truck nga nagpailang wa mo brake ang drayber, limpyo ang makina ug wala usa’y leaking sa krudo.
“Kaning blackspot investigation himuon ni siya ilabi na kon naay mga aksidente. So, usa sa among gi-conduct og investigate ang truck mismo. So, ang truck mismo amo gipa-inspect sa may mga ligid kay makita man na ang mga fluid. So, pag check sa ligid, wa may niagas nga mga fluid ang timailhan nimo nga dili makakupot ang break once mo buto ang rubber cap unya kanang rubber cap naa nay brake fluid. Di na makakupot sa brake, mo-agas ang fluid,”matod ni Tumulak sa interbyu sa Disyembre 6, 2021.
“Sa pag inspeksyon namo wala mi nakita nga fluid, limpyo kaayo ang mga ligid,”saysay niya.
Tungod niini, gikompirmar ni Tumulak nga kusog ang pagpadagan sa driver sa truck nga si Ben Chin Udtohan, kinsa nakalas usab atol sa hitabo.
“Matawag namo nga confirm nga kusog ang iyang dagan ug confirm sad namo nga way brake nga gitamakan,”matod ni Tumulak.
Hinuon, wala gisalikway sa mga awtoridad ang posibilidad nga giatake si Udtohan sa kasingkasing subay sa taho sa 17-anyos nga truckboy nga giingong nag tul-id lang ang mga kamot ug usa ka tiil niini nga nagyatak sa gasolinador, conscious apan daw wa makadungog sa senyas sa truckboy sa ilang masugatan nga disgrasya.
“Samtang pagbiya nila sa quarry site wa siya’y namatikdan nga kalainan sa driver. Gani naghisgot pa sila asa sila maniudto, Asa sila magpalit og kan-on pero anha na padung sa Mananga Bridge nga nikusog na ang iyang dagan. Samtang nikusog ang dagan, ang duha ka kamot sa driver ni tul-id nga nagkupot sa manobela unya ang tiil niini ang right side sa tiil nitul-id sad. So, iyang gisinggitan nga kuya madasgrasya na ta, kuya. Pero daw wa kuno makadungog ang driver sa iyang storya unya wa nay tingog tingog ang driver,” matod ni Tumulak.
Samtang giila sa CT-TODA ang nangamatay nga sila si Glen Baclay Traya, taga Bgry. Tapul, Talisay City; Paquito San Pedro, Jr., taga Nivel Hills, Brgy. Apas, Dakbayan sa Sugbo; Mercedita Espinosa, taga sityo Didos, Linao, Talisay; Jose Wendel Cataquez; ug Ben Chin Udtohan, drayber nga sa dumptruck nga “nangdasmag”, taga San Miguel, Manolo Fortich, Bukidnon.