DUL-AN sa duha ka kilo sa gituohan nga shabu ang nasakmit sa mga operatiba sa Minglanilla Police Station sa Dominggo sa gabii, Disyembre 5 atol sa buy-bust sa Barangay Tungkil, lungsod sa Minglanilla.
Si Police Major William Homoc, hepe sa Minglanilla Police Station maoy nangu sa buy-bust operation uban ang iyang mga sakop sa Drug Enforcement Unit (DEU)nga miresulta sa pagkasikop sa suspek nga si Eric Bacaresas Lapeña, 39, taga sityo Mutra, Barangay Tisa, Dakbayan sa Sugbo.
Si Lapeña giingong notadong durugista ug gihulagway nga regional high value individual.
Matod ni Homoc nga nakuha gikan kang Lapeña ang 1,875 gramos sa gituohang shabu nga mobalor og P12.7 milyunes base sa street drug value.
"Didto namo nadakpan si Lapeña sa Barangay Tungkil kay didto man ang sabot sa ilang paghinatagay sa atong pusuer buyer nga atong operatiba,”matod ni Homoc.
Dugang ni Homoc nga kapin sa duha ka semana ang ilang pag monitor kang Lapeña sanglit idlas usab sa pakigsabot sa kadtong mga mopalit niini hangtod nga nisugot ra nga adto mag abot sa Minglanilla.
Unang nakuha gikan kang Lapeña ang medium pack sa gituohang shabu.
Sa pagrekisa nakuha gikan kaniya ang uban pang mga putos nga dunay sulod sa gituohang shabu.
Gihulagway usab ni Homoc nga lapad sa iyang pag pamaligya og drugas kay abot siya sa Siyudad sa Sugbo, Dakbayan sa Talisay, Minglanilla, Naga, San Fernando ug Carcar.