SA ikaduhang higayon, nanumpa sila si Mayor Michael Rama ug Bise Mayor Donaldo Hontiveros alang sa ilang pormal nga pag-asumir sa katungdanan human namatay si Mayor Edgardo Labella niadtong Nobiyembre 19, 2021.
Sa samang higayon, pormal na usab giistalar ni Rama ang iyang mga co-terminus nga opisyal nga gipangulohan ni Atty. Dominic Diño isip Secretary to the Mayor, designate City Administrator Suzzane Ardosa ug ang nagpabilin nga si assistant City Administrator Mary Rose Lubino.
Iya usab gitudlo si Atty. Mat Medalle isip chief of staff, Atty. Homer Cabaral isip resident Ombudsman ug City Attorney Eugene Orbita.
Ang kanhi chief of staff ni Rama dihang napili siya isip bise mayor nga si Engr. Dax Arcilla karon mao na ang pangulo sa Division for the Welfare of the Urban Poor (DWUP) samtang si Cerwin Eviota ang bag-ong public information officer (PIO).
Nikompleto sa mga bag-ong gipahiluna ni Rama mao si Engr. Rolando Ardosa aron mangulo sa Department of General Services hulip ni Atty. June Maratas nga tinudlo ni Labella sugod sa 2019.
Gibutang ni Rama isip barangay affairs head si Ian Hassamal, Protocol Office si Neil Odchigue, CHAMP head Regina Lingaolingao ug Cebu City Medical Center (CCMC) Assistant head for administration si Sonia Empinado.
Gikan sa pag-asumir ni Rama sa gahom, ang 27 ka departmento ilawom sa Office of the Mayor iyang gibutangan og mga overseer sa pagpadagan sa nahisgotang mga departmento sa tinguha nga molambo pa ang ilang pagserbisyo.
Sila si Rama ug Hontiveros unang nanumpa sa katungdanan niadtong Nobiyembre 20 atubangan ni Court of Appeals Justice Gabriel Inglis sa buhatan sa bag-ong Office of the Mayor.