SUKAD gisugdan sa 2017 ang Barangay Drug Clearing Program (BDCP), ang Philippine Drug Enforcement Agency (PDEA) 7 nakadeklarar na og 1,057 ka mga barangay nga drug cleared.
Nagpasabot kini, sigun ni PDEA-7 Director Levi Ortiz, nga sa 3,003 ka barangay sa tibuok Central Visayas (CV) 7, ang tanang drug personalities nga mitahan sa ilang kaugaling napaubos sa community based drug rehabilitation program.
Gawas niini, adunay ilang nahatagan og certification nga 116 ka mga barangay nga wala maapektohi sa problema sa illegal nga drugas ang labing daghan niini naa sa Negros Oriental nga adunay 53 ka barangay, gisundan sa probinsya sa Siquijor nga adunay 27 samtang 18 sa probinsya sa Sugbo ug 17 sa lalawigan sa Bohol.
Nagpabilin nga walay gideklarar nga drug-free barangay sa dakbayan sa Sugbo sanglit ang tanang 80 ka barangay pulos apektado sa illegal nga drugas.
Dugang ni Ortiz nga bisan walay naila nga drug free sa dakbayan sa Sugbo, iyang gipasabot ang kakugi sa barangay officials inabagan sa suporta sa kagamhanan sa dakbayan aron mapaubos sa drug rehabilitation ang drug personalities.
Dunay gipaabot nga mosunod nga mga barangay sa dakbayan sa Sugbo ang madeklarar nga drug cleared tungod sa paningkamot sa mga opisyal sa barangay ug kapulisan sa pagkuha sa mga rekisito aron madeklarar sa PDEA.
Labing daghang barangay nga drug cleared mao ang probinsya sa Sugbo nga dunay 418, gisundan sa Bohol nga dunay 393 ug 112 sa Negros Oriental.