TALIWALA sa hulga sa coronavirus disease 2019 (Covid-19) pandemic, kanselado gihapon ang Dagitab Festival sa Dakbayan sa Naga sa habagatang Sugbo, apan ang lokal nga kagamhanan nag-andam na og sunod-sunod nga mga kalihukan alang sa publiko.
Ang Dagitab usa ka festival of lights nga gisaulog sa Dakbayan matag Disyembre 23 sa matag tuig, duha ka adlaw sa dili pa ang Pasko.
Sa usa ka interbyu niadtong Disyembre 5, 2021, si Mayor Kristine Vanessa Chiong niingon sa Sunstar Cebu nga ang “Pasko sa Naga” nga nahimutang sa plaza sa dakbayan pasigaon sa Disyembre 8.
Si Chiong niingon nga ang ceremonial lighting gitumong aron sa paghatag og paglaom sa katawhan sa dakbayan sa Naga ug niadtong mga bisita gikan sa ubang mga dapit.
“The whole park will be lighted, giving hope and at least Christmas spirit amid the pandemic,” matod ni Chiong.
Gidugang sa mayor nga ang gitugot nga kapasidad sa parke naa lang sa 70 porsyento ug kinahanglan nga sundon ang minimum nga standard sa panglawas.