GISUSPENSO ni Mayor Michael Rama ang paggamit sa cash cards sa libuan ka mga senior citizen alang sa ilang pagdawat sa P3,000 nga maoy katapusang financial assistance alang sa 2021.
Kini human gianunsyo ni Rama nga unahon paghatag ang mga fully vaccinated senior citizens ug isunod paghatag ang ayuda alang sa naka-first dose o partially vaccinated.
Ang distribution sa financial assistance ipahigayon sa mga sports complex sa matag barangay sa Disyembre 18, 2021.
Ang sistema sa distribution sa senior citizens mao sab ang gamiton alang sa persons with disability (PWD) nga makadawat sa ilang P3,000 nga ayuda karong Disyembre 11, 2021.
“I have made a statement, unahon paghatag ang financial assistance sa PWD sa tanang fully vaccinated sunod ang partially vaccinated... Senior citizens, unahon ang fully vaccinated after ang partially vaccinated,” padayag ni Rama atol sa flag raising ceremony sa Lunes sa buntag, Disyembre 6.
Gipahibawo sa mayor nga mopahigayon og “massive vaccination at your home” ang City Government pinangulohan ni Dr. Jeffrey Ibones aron mabakunahan ang kadtong wala pa makapabakuna batok sa Covid-19.
Wala pa usab mobutyag si Rama kon makadawat ba o dili ang kadtong mga senior citizen o PWD kinsa dili gusto nga magpabakuna.
Base sa record, 41 porsyento pa sa mga senior citizen ang bakunado gikan sa kapin 90,000 nga rehistrado sa Siyudad.
Dul-an 25,000 pa ka senior citizens ang nakadawat sa cash cards gikan sa Land Bank of the Philippines (LBP).
Unang na turnover sa banko ang 25,000 ka cash cards niadtong Disyembre 2020 samtang ang ikaduhang batch nga dul-an sa 10,000 nahatag niadtong Hulyo.
TUMULAK NIHANGYO
Si Konsehal Dave Tumulak nihangyo kang Rama nga i-reconsider ang iyang direktiba ug sabton ang mga senior citizen ug PWD kinsa dili magpabakuna gumikan sa ilang tagsa-tagsa ka mga rason aron ila gihapong madawat ang ayuda nga gitagana alang kanila.
“Ato lang gihangyo ang atong mayor to reconsider kay matawag man gud nato nga discriminatory statement ang imong pag-ingon nga ipa-iwit paghatag ang financial assistance kay unahon tong mga vaccinated,” matod ni Tumulak.
Ang konsehal sa south district kinsa anaa na sa iyang katapusang termino ug nikandidato pagka-mayor sa 2022 elections nagkanayon nga angay respetuhon ang health issues sa mga senior citizen.
Laing katarungan sa mga wa magpabakuna mao ang ilang relihiyon.
Niawhag si Tumulak nga hingusgan pa ang information dessimmination aron masabtan sa tanan ang labot sa bakuna.
“Dili nato ingnon nga karong panahona kay tinghatag dili sila hatagan or ipa-iwit sila. Dili sad na makiangayon kay timan-i ang atong mga senior citizen dako kaayo ni og na-contribute sa dakbayan sa Sugbo and we should honor them and we should also respect their decision,” matod ni Tumulak. /